Xefe Estadu Maiór Jenerál FALINTIL-Forsa Defeza  Timor Leste (F-FDTL), Majór Jenerál Lere Anan Timur. Imajen/Antonio Goncalves

DILI, 22 jullu 2020 (TATOLI)- Xefe Estadu Maiór Jenerál FALINTIL-Forsa Defeza  Timor Leste (F-FDTL), Majór Jenerál Lere Anan Timur, husu  Governu atu kontinua prepara kondisaun liuliu iha parte rekursu umanu no infrastrutura, hodi apoiu Autoridade Marítima nia servisu, bainhira Sistema Autoridade Marítima ne’ebé foin lalais Governu aprova, hetan promulgasaun ba nia ezisténsia husi Xefe Estadu.

Lere Anan Timur husu ne’e, hafoin enkontru semanál ho Xefe Estadu, Francisco Guterres Lú Olo, iha palásiu Prezidensiál Bairru-Pité, Dili.

“Ita-nia governu aprova ona Sistema autoridade marítima. Ida ne’e hanesan dokumentu subjetivu teóriku, no parte materiál ne’e tenke kria kondisaun, kria meiu mak hanesan rekursu umanu, infraestrutura. Ita tenke iha kais, tenke iha ró para-fatin ne’ebé di’ak, iha fatin ba doka atu bele halo manutensaun ba ró iha rai-maran no seluk tan.  Ho kondisaun sira ne’e mak ita foin hanoin atu bele sosa ró. Ezemplu ami-nia ró ne’ebé mak oras ne’e iha hela portu Dili, loron kalan kuandu ema atu hatun buat ruma, sempre haruka ami-nia ró sai husi fatin ne’ebá. Ne’e ladun diak. Ita-nia ró ne’ebé iha Hera mós infraestrutura ladún diak, tanba ne’e mak ita presiza kria uluk kondisaun molok hanoin atu sosa ró”, Lere hateten.

Entretantu, iha loron 15 fulan jullu 2020, Governu liuhosi desizaun Konsellu-Ministru (KM) aprova ona projetu Dekretu-Lei ne’ebé aprezenta hosi Ministru Defeza, Filomeno da Paixão de Jesus, kona-ba Sistema Autoridade Marítima (SAM).

Sistema ne’e hakarak afirma soberania nasionál no projeta Estadu nia autoridade iha tasi ne’ebé sujeita ba jurizdisaun Timór nian no bele estabelese ona iha ‘Estudu Forsa 2020’ iha Planu Estratéjiku Dezenvolvimentu Nasionál (PEDN) 2011-2030 no mós iha Konseitu Estratéjiku ba Defeza no Seguransa Nasionál ne’ebé daudaun ne’e vigora hela.

Ho dekretu-lei ne’e sei kria mós Autoridade Marítima Nasionál (AMN) no Xefe Estadu Maiór Jenerál hosi Forsa Armada maka sei kaer rasik knaar ne’e.

Jornalista       : Cipriano Colo

Editór             : Rafy Belo

HAKEREK NO HATÁN

Please enter your comment!
Please enter your name here