MInistru Edukasaun Juventude no Desportu, Armindo Maia. Imajen/Egas Cristovão

DILI, 21 jullu 2020 (TATOLI)-Governu liuhosu Ministru Edukasaun Juventude no Desportu, Armindo Maia, tersa ne’e hakat bá Edifísiu Câmara Ekleziastika Dioseze Dili, hodi hetan apoiu husi Lidér Igreja Katólika, Arcebispu Metropolitanu Dili, Dom Virgílio do Carmo da Silva SDB, ba dezenvolve setór edukasaun.

“Ita mai husu ba Dioseze Dili atu fo liman ba malu atu hamutuk serbí ba rai ida ne’e ba timor-nia oan hotu nu’udar sarani atu lori edukasaun ba futuru ida di’ak liu,” dehan Governante hafoin hasoru Amu Bispu Dom Virgílio iha Lecidere, tersa ne’e.

Notísia Relevante :Igreja Katólika Sei Kontinua Apoiu Governu Dezenvolve Setór Edukasaun

Sorumutu entre parte rua ne’e hodi manifesta kooperasaun ba aselera prosesu dezenvolvimentu iha setór edukasaun liliu iha kapitál nasaun.

Tuir istória pasadu durante tinan atus liubá, Igreja katólika konsege forma ona Timoroan sira ho kualidade liuhosi edukasaun formal sira, tanba ne’e Governu presiza hetan apoiu moral no polítika ba dezenvolvimentu setór edukasaun.

“Ita hatene iha Dioseze Dili iha mós eskola katolika, estudante sira ne’e mós mesak Timoroan nia oan de’it, tanba ne’e  ita husu Dioseze  Dili liuhusi Dom Virgílio atu haree hamutuk  hodi dezenvolve  edukasaun iha eskola públika sira,” tenik Governante.

Hatan ba pedidu ne’e, Arcebispu Metropolitana Dili, Dom Virgílio do Carmo da Silva SDB, afirma Igreja Katólika iha Timor-Leste sei kontinua fó apoiu ba Governu hodi dezenvolve setór edukasaun tanba konsidera nu’udar airin ba futuru nasaun nian.

“Ita hotu sei fo apoiu másimu ba ita-nia na’i ulun sira ne’ebé assume responsablidade iha área ne’e atu hamutuk neineik  halo kontinuasaun ba buat ne’ebé iha ona bele sai di’ak liután,”katak Nia.

Jornalista   : Tomé Amado

Editór         : Agapito dos Santos

HAKEREK NO HATÁN

Please enter your comment!
Please enter your name here