Reuniaun Konsellu Ministru iha Palásiu Governu, kuarta (22/07). Imajen Tatoli/Egas Cristovão

DILI, 22 jullu 2020 (TATOLI) – Governu liuhosi reuniaun Konsellu Ministru (KM) hahú analiza opsaun oin-oin ba polítika lejizlativa kona-ba enkuadramentu legál Orsamentu Jerál Estadu (OJE) nian no Jestaun Finanseira Públika.

Proposta ne’e rasik aprezenta hosi Ministru Finansa, Fernando Hanjam.

Ministru Prezidénsia Konsellu Ministru, Fidelis Manuel Leite Magalhães, hateten Ministériu Finansa aprezenta proposta ne’e tanba konsidera reforma fiskál no reforma jestaun finansa públika sai nu’udar prioridade VIII Governu Konstitusionál tuir saida maka estabelese iha programa no elementu esensiál hosi reforma ne’e rasik, ne’ebé halo ona revizaun ba Lei Orsamentu no Jestaun Finanseira.

“Nune’e bele hadi’a aprovizionamentu no hametin desentralizasaun finanseira no orsamentu bazeia ba programa,” dehan Ministru Fidelis hafoin reuniaun ezekutivu iha Palásiu Governu, kuarta ne’e.

Maski nune’e, ezekutivu sira seidauk aprova proposta ne’e no Governu sei kontinua analiza matéria kona-ba asuntu ne’e iha sorumutuk Konsellu Ministru tuir mai.

Antes ne’e, iha reuniaun KM Governu aprova Proposta Alterasaun datoluk ba Lei númeru 13/2019, 21 outubru, kona-ba Orsamentu no Jestaun Finanseira artigu 31 hodi bele fó fleksibilidade ba Governu durante rejime duodesimál.

Iha alterasaun ne’e regula kona-ba rejime duodesimál atu permite flesibilidade balun, nune’e Governu liuliu Ministériu Finansa bele atende pedidu urjénsia no pedidu ne’ebé labele haree de’it ba um doze avo rasik.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here