DILI, 21 jullu 2020 (TATOLI) – Vise-Ministru Obra Públika, Nicolau Lino Freitas Belo entrega relatóriu annuál ba Primeiru-Ministru (PM), Taur Matan Ruak, kona-ba atividade ne’ebé nia asume, no iha relatóriu ne’e hatudu katak falta porsentu 20 populasaun maka seidauk asesu ba enerjia eletrisidade maibé kestaun ne’e prevee ona iha planu Orsamentu Jerál Estadu (OJE) 2021.
“Ha’u mai relata atividade, liuliu ha’u nia papél hanesan Vise-Ministru no ha’u hato’o relatóriu ba atividade tomak iha tinan-ida nia-laran. Iha relatóriu ne;e hatudu porsentu 20 populasaun seidauk asesu eletrisidade,” hateten Vise-Ministru Nicolau hafoin entrega reletóriu ba Xefe Governu iha Palásiu Governu, tersa ne’e.
Ba kestaun ne’e, Ministériu Obra Públika (MOP) identifika ona iha suku hamutuk 77 iha territóriu tomak maka seidauk asesu ba eletrisidade, tanba ne’e MOP tau ona ba planu prioridade 2021 hodi implementa pakote 33 iha faze dahuluk, ne’ebé finaliza ona ninia ninia dezeñu no Bill of Quantity (BoQ).
Pakote 33 eletrisidade ne’ebé sei implementa kuaze iha munisípiu hotu no ninia prioridade bazeia ba suku ne’ebé besik liu ona liña infraestrutura ka distribuisaun ne’ebé ezistente atu nune’e bele diretamente halo konesaun ba enerjia eletrisidade.
Daudaun ne’e ekipa MOP nafatin tun ba munisípiu sira atu dezenvolve liután restante suku ne’ebé seidauk iha dezeñu no BoQ atu nune’e bainhira karik iha posibilidade espasu fiskál ba MOP bele aumenta suku balun.
Nicolau informa, tuir dadus MOP nian katak populasaun ne’ebé asesu ona bee-moos hamutuk porsentu 50.
“Signifika katak sei hela porsentu 50 mak Governu liuhosi MOP presiza esforsu atu haree esforsu ne’ebé maka tenke iha orsamentu,” nia akresenta.
Nia esplika, atividade ne’ebé durante ne’e nia halo maka dezenvolvimentu infraestrutura ne’ebé mak kabe ba kompeténsia MOP iha setór bee no saneamentu, eletrisidade, planeamentu urbanu no abitasaun, nune’e mós ba obra públika rasik liuliu ba iha estrada, ponte no kontrolu cheia.
Governante ne’e haktuir, durante enkontru Primeiru-Ministru hameno katak mandatu VIII Governu nian hela de’it tinan-rua no iha 2020 laiha orsamentu to’o utiliza de’it orsamentu doudesimál, tanba ne’e presiza prepara planu ne’ebé di’ak ba tinan oin.
“Signifika dezenvolvimentu labele la’o no kontinua de’it ho orsamentu ne’ebé la sufisiente. Nune’e Primeiru-Ministru fó hanoin iha faze planeamentu bainhira prepara OJE 2021 nian presiza tebes iha orsamentu atu tau iha prioridade sira ne’ebé sempre Parlamentu kestiona, liuliu komunidade iha territóriu nia nesesidade,” Nicolau haktuir.
Xefe Governu mós husu ba governante ne’e atu koordena di’ak ho diresaun hotu, liuliu nível tékniku sira atubele atije objetivu no meta ne’ebé define ona.
Jornalista: Antónia Gusmão
Editora: Julia Chatarina
