Sekretária Estadu ba Igualdade no Inkluzaun, Maria José da Fonseca Monteiro de Jesus.Imajen/Tatoli/Eugénio Pereira

DILI, 21 jullu 2020 (TATOLI)–-Sekretária Estadu Igualidade Inkluzaun (SEII), Maria José da Fonseca Monteiro de Jesus, fó sujestaun Agência TATOLI.IP atu tau prioridade ba iha problema ne’ebé akontese iha sosiedade nia leet ligasaun maka’as ho promosaun igualdade no inkluzaun.

Governante ne’e hato’o kestaun ne’e iha ámbitu komemorasaun aniversáriu Agência TATOLI.IP ba dahaat (IV) ne’ebé sei selebra iha 27 jullu, semana oin. Nia husu ba ekipa TATOLI.IP atu hato’o informasaun sira ne’ebé loloos no momoos, atu bele eduka sosiedade sai sosiedade ida-ne’ebé edukada.

“Ha’u-nia sujestaun maka imi bele mós ajuda atu públika kona-ba problema desigualdade ne’ebé iha hela no oinsá maka ita bele halo promosaun ba igualdade inkluzaun ne’ebé di’ak liután. Tanba, ha’u hanoin knaar ne’e ita hotu nian atu fó hanoin ba públiku no eduka públiku importante involve ema hotu atu la halo diskriminasaun ba ema ida,” dehan Maria José da Fonseca Monteiro de Jesus ba Agência TATOLI hafoin hasoru malu ho Vise-Ministru Turizmu Komérsiu Indústria (MTCI, sigla portugés) iha Faról, Dili, segunda ne’e.

Nia hatutan, mídia nia papél importante tebes atu eduka no promove informasaun hotu, tanba ne’e ba oin kontinua fahe informasaun ba públiku nafatin ho edukativu.

“Maski seidauk to’o 27 jullu TATOLI halo aniversáriu ba da-haat maibé antisipadamente ha’u hakarak hato’o ha’u-nia parabens ba ekipa mídia TATOLI.IP. Tanba durante ne’e, TATOLI halo servisu ne’ebé di’ak no loloos. Ba oin, ha’u husu kontinua fahe informasaun ba iha públiku ho edukativu nafatin no ami hakarak de’it mak susesu tomak nafatin ba ekipa TATOLI.IP tomak,” nia dehan.

Iha biban ne’e, nia husu ba jornalista TATOLI.IP tomak, atu ba oin servisu di’ak liután no kontinua nafatin asegura informasaun ne’ebé públika ne’e tenke loloos no kredivél.

“Ba oin, susesu nafatin, hala’o servisu ho di’ak liután no hein katak ekipa tomak ne’ebé hala’o servisu liuliu maluk jornalista sira bele nafatin asegura informasaun ne’ebé imi hatún ne’e, tenke loloos no kredivél. Atu asegura katak ita ajuda mós ba ita-nia públiku ho informasaun ida loloos no informasaun ida-ne’ebé la diskriminativu ba komponente ne’ebé de’it,” nia hateten.  

Tanba ne’e, governante ne’e hato’o mensajen ba jornalista TATOLI.IP atu mantein hodi hakerek no públika notísia ne’ebé di’ak atu nune’e ba futuru halo di’ak liután.

“Ha’u-nia mensajen ba jornalista TATOLI.IP tomak, ha’u husu de’it ita-boot sira durante ne’e halo servisu ida ne’ebé di’ak loos maibé se bele notísia ne’ebé agora halo di’ak ona ne’e ba-oin halo di’ak liután. Maibé, iha tempu hanesan mós koko atu hatudu hosi ezemplu imi nia-aan rasik. Antisipadamente mós fó parabens ba ekipa mídia TATOLI.IP, tanba durante ne’e halo servisu ne’ebé di’ak no loos,” nia dehan.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here