Adidu Militár Estadus Unidus Amerika nian, Majór Pablo Valerin akompaña hosi Komponente Navál Lijeira F-FDTL, Kapitaun Fragata, João da Silva partilla informasaun ba kona-ba ezersísiu South East Asia Cooperation Against Terrorism (SEACAT) Maritime Domain Awareness Symposium. Imajen/Eugénio Pereira

DILI, 20 jullu 2020 (TATOLI)- Forsa Marina Estadus Unidus Amerika (EUA) koopera ho Komandu FALINTIL-Forsa Defeza Timor-Leste (F-FDTL)  fó formasaun ba Komponente Forsa Navál Lijeira F-FDTL hodi realiza ezersísiu South East Asia Cooperation Against Terrorism (SEACAT) Maritime Domain Awareness Symposium.

Formasaun ne’e rasik sei hala’o hosi Adidu Militár Forsa Estadus Unidus Amerika, Majór Pablo Valerin, ba membru F-FDTL   Komponente Navál na’in-10 ho durasaun loron tolu, hahú hosi loron 21 too 23 jullu 2020.

Majór Pablo Valerin dehan,  ezersísiu SEACAT nu’udar treinamentu ida ne’ebé halo envolve nasaun forsa 50, inklui Timor-Leste hodi haree liubá kestaun seguransa iha tasi nasaun hotu-hotu nian.

Formasaun ba membru forsa Navál F-FDTL ne’e importante tebes, tanba Timor-Leste sai ona membru observadór SEACAT presiza atu hatene mós informasaun globál kona-ba seguransa tasi nian hodi bele prepara-an ba futuru próteze ninia rikusoin iha tasi.

“Ezersísiu SEACAT ne’e importante tebes envolve nasaun-50 inklui Timor-Leste iha rejiaun ASEAN ne’ebé tau sira nia adia hodi partilla informasaun kona-ba seguransa marítima nian, tanba Timor-Leste nia ekonomia depende ba mina no gás presiza próteze ita boot sira-nia tasi hodi hametin ita boot sira-nia relasaun iha rejiaun ASEAN,” Majór Pablo hateten.

Nia dehan, EUA sente kontente tebes, tanba bele servisu hamutuk Timor-Leste no membru forsa nasaun-50 ne’ebé halibur-an iha ezersísiu SEACAT.

Formasaun ne’e hetan apoiu mós hosi Forsa Marina Portugál, Australia ne’ebé hala’o misaun hodi apoia dezenvolvimentu F-FDTL nian.

Iha fatin hanesan, Komandante Komponente Navál F-FDTL, Kapitaun Fragata, João da Silva, hato’o agradese tebes ho formasaun ne’e tanba importante tebes hodi eleva membru sira-nia kapasidade hodi dezenvolve Instituisaun F-FDTL liu-liu Komponente Navál.

“Adidu Militár Amerika mai fó formasaun ida ne’e konvida Timor-Leste hanesan membru observadór ba ezersísiu SEACAT ida ne’e.  Ezersísiu SEACAT ne’e importante, tanba Timor-Leste mós bele fó kontribuisaun ba iha estabilidade seguransa iha área tasi nian liu-liu iha área rejionál,” João da Silva hateten.

Kapitaun Fragata João da Silva hatutan, mezmu Timor-Leste agora daudaun sei sai hanesan membru observadór ba SEACAT, maibé Timor-Leste bele aprende ona matéria importante sira, liu-liu hodi partilla informasaun ba nasaun membru SEACAT hodi hametin nafatin kooperasaun servisu iha área tasi nian.

“Apejar Timor-Leste hanesan observadór, maibé  SEACAT mós fó oportunidade atu partilla informasaun hodi ita mós bele envolve hodi halo aprezentasaun hodi servisu hamutuk akompaña di’ak liután formasaun ne’e,” nia hateten.

Nia hatutan, daudaun ne’e membru forsa Navál barak maka ba tuir ona formasaun iha rai li’ur hodi bele prepara-an servisu ho membru forsa nasaun viziñu sira atu próteze Timor-Leste nia rikusoin iha tasi.

Tuir planu, iha loron 27 jullu ne’e, Governu Australia koopera ho Governu Timor-Leste liuhosi Ministériu Defeza sei hala’o serimónia auto entrega no lansamentu konstrusaun rede arame hale’u baze Navál Hera nian.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here