Prezidente Tribunál Rekursu, Deolindo dos Santos. Imajen Tatoli/Egas Cristovao

DILI, 21 jullu 2020 (TATOLI)- Prezidente Tribunál Rekursu (PTR), Deolindo dos Santos relata, iha ámbitu enkontru ho Prezidente Repúblika (PR), Francisco Guterres ‘Lú Olo’, katak depois de Estadu Emerjénsia (EE), Tribunál sira iha progresu di’ak tanba konsege redús númeru prosesu pendente sira.

“Durante enkontru ami ko’alia de’it kona-ba prosesu sira, katak, durante ne’e ami hala’o hela prosesu sira komesa normál ona, tanba, depois de  estadu emerjénsia, juis sira idadak fila ba nia fatin ona, sira komesa servisu ona, no iha tan mudansa balun ne’ebé mak ita halo atu hafasil liu tan servisu tribunál nian, ida ne’e mak sira esforsu atu bele aselera prosesu sira ne’e ho forma ne’ebé lais tuir kondisaun idaidak nian. Ha’u hato’o ba Prezidente Repúblika katak, ita iha mudansa no progresu  di’ak”, Deolindo hato’o ba jornalista sira, hafoin enkontru ho Xefe Estadu iha palasiu Prezidensial Bairru-Pité, Dili.

Deolindo hato’o ba Xefe Estadu kona-ba progresu ne’e, tanba, iha tribunál distritál Baucau, antes ne’e iha prosesu hamutuk 2.000, no data ikus mak horisehik, redús ona ba iha prosesu 600 resin.

“Ne’e redusaun ida ne’ebé hatudu katak, barak tebes, no mós iha tribunál Suai, agora daudaun iha prosesu sivíl hamutuk 200 resin, no krime iha prosesu hamutuk 800 resin. Antes ne’e sira iha prosesu krime nian hamutuk 900 resin, maibé, agora iha redusaun, entaun agora sira iha prosesu hamutuk 1000 resin”, PTR ne’e esplika.

Kona-ba Oe-Cusse, nia hataten, oras ne’e iha prosesu hamutuk 500 resin, ho totál prosesu kazu sivíl hamutuk 113 no restu kazu krime.

“Dili nian mak sei boot nafatin, kazu krime ne’e iha 200 resin, no sivíl iha 1000 resin”, Deolindo subliña.

Nia mós fó hanoin katak, iha Tribunál Rekursu, pratikamente iha semana hirak liu ba iha prosesu hamutuk hitu (7) depois iha kinta feira ne’e sa’e, tanba prosesu foun tama, no horisehik iha loron segunda, iha ona prosesu hamutuk 11, la’ós prosesu akumulasaun, maibé prosesu ne’ebé mak tama foun.

“Tanba ne’e, hahú agora ba oin Tribunál Rekursu esforsu atu labele iha tan akumulasaun prosesu, bele iha pendente ho númeru ne’ebé ki’ik no bele dudu prosesu sira ne’e ho lais”, Deolindo subliña tan.

Nia mós informa liután katak, iha tribunál primeira instánsia sira, liuhosi konsellu majislatura rasik halo jestaun ida tan, atu redús prosesu sira ne’e ho forma ne’ebé maka lais, maibé, ida ne’e ninia implikasaun husi orsamentu no rekursu umanu ne’ebé iha, tribunál tenta nafatin atu bele halo jestaun ho forma oioin, nune’e bele redús prosesu sira nee.

Hato’o mós ba Prezidente Repúblika katak, Tribunál sei tama ba férias judisiál, hahú iha loron 1 fulan agostu, to’o 15 setembru tinan ne’e.

“Ne’e ninia implikasaun katak, iha ninia prosesu ho nia karákter urjente de’it, maka, tribunál sei hala’o deit prosesu ne’ebé mak juis sira marka tiha ona”, nia esplika.

Maibé, nia mós informa katak, kona-ba mapa férias judisiáriu ba juís sira ne’ebé maka aprova iha sesta feira liu ba, hatudu katak, maioria juís sira la foti férias durante feriadu judisiál ne’e, ho objetivu katak, sira hakarak atu finaliza prosessu balun durante périodu ida ne’e.

“Tanba, em prinsípiu durante fulan rua ba tolu, estadu emerjénsia, prosesu pendente maka akumula hela iha tribunál, nune’e juís sira ho hanoin ida katak, atu bele finaliza prosesu sira ne’e aproveita férias judisiál ida ne’e, depois mak sira bele goja fali sira-nia férias iha tempu balun ne’ebé kuandu sira hakarak”, Deolindo informa.

Notísia relevante:TDD Halo Distribuisaun Prosesu Hodi Aselera Kazu Pendente

Jornalista       : Cipriano Colo

Editór             : Rafy Belo

HAKEREK NO HATÁN

Please enter your comment!
Please enter your name here