Logotipu Tribunál Distritál

DILI, 21 jullu 2020 (TATOLI) – Ministériu Públiku (MP) akuza arguidu ho inisiál CFP ho krime burla agravadu tanba deskonfia “bosok” lezadu DB hodi entrega osan ho valórv$8.500,00 ne’ebé simu hosi governu ba subsídiu martires hodi aprópria ba arguidu.

Tuir loloos audiénsia julgamentu hala’o ohin hodi rona deklarasaun arguidu no lezadu, maibé juis koletivu seidauk prienxe tanba ne’e labele realiza. Nune’e, Juiz Evangelino Belo deside adia hikas fila-fali ba iha loron 30 outubru, tinan ne’e,  iha tuku 14:00 Otl.

Faktu ne’ebé arrola hosi Ministériu Públiku (MP) katak, lezadu ho inisiál DB hanesan alin husi martires Alberto Guerreiro, ne’ebé mate iha tinan 1976, trata dokumentu maibé komu la kompriende di’ak entaun husu ajuda ba arguidu hodi trata dokumentu to’o Komisaun Omenajen Nasionál. Ikus mai Komisaun aprova no lezadu simu osan martires nian ho montante $28,520,00 iha loron 31 outubru 2018.

Lezadu hamutuk ho testemuña ho inisiál V, no J ho arguidu CP maka foti osan refere. Kuandu foti tiha osan, lezadu, testemuña no arguidu sira ba testemuña J nia uma hodi deskansa no han meudia no iha ne’ebá no  lezadu fó  $500.00 ba arguidu hanesan osan kolen nian.

Kuandu sira han hela, arguidu simu telefone hosi ema ida no arguidu ko’alia ba lezadu katak iha funsionáriu huoi Komisaun Omenajen Nasionál husu atu lezadu fó osan komisaun ho montante $7.000,00 ba funsionáriu refere ne’ebé arguidu la temi naran.

Iha momentu ne’e kedas, lezadu hamutuk ho testemuña sira sura osan ho montante mensionadu no entrega ba arguidu atu fó ba funsionáriu ida hosi Komisaun Omenajen Nasionál, ne’ebé la identifikadu.

Lezadu ho testemuña J hakarak tuir arguidu atu entrega osan ba ema refere, maibé arguidu rejeita no ko’alia katak nia atu hasoru ulun boot, Komisaun Omenajen Nasionál.

Iha Novembru  2018, iha Suku Coliati, Hatolia, arguidu husu tan osan kolen nian ba lezadu, nune’e lezadu fó tan osan $1.500,00 ba arguidu.

Ikus mai lezadu ho testemuña sira deskobre katak funsionáriu hosi Komisaun Omenajen Nasionál la husu osan ba arguidu no arguidu la entrega osan ho montante $7000.00 ba ema ruma husi Komisaun Omenajen Nasionál, katak arguidu maka foti ba nia-an rasik osan ho montante hamutuk $9.000,00.
Tamba ne’e, lezadu husu ba arguidu atu devolve fali osan ho montante $8.500,00 ba lezadu ho nia família sira.

Arguidu komete faktu ne’e ho forma livre, deliberada no konsientemente, bosok ka lohi lezadu hodi foti ba nia-an rasik osan ho montante $7.000,00 rezulta lezadu sofre prejuizu material, arguidu hatene katak hahalok ne’e proibidu no hetan punisaun tuir lei penal maibé nia kontinua pratika asaun ne’e. Nune’e konstitui arguidu hanesan autór material, forma konsumada ba krime burla agravadu ne’ebé previstu iha artigu 266 no artigu  267 kódigu penál.

Audiénsia ne’e Ministériu Públiku reprezenta hosi Prokuradór Domingos Barreto no Defensór Públiku Marçal Mascarinhas.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here