Sekretária Estadu Igualdade no Inklusaun, Maria Jose da Fonseca Monteiro de Jesus. Imajen/ Egas Cristovão

DILI, 20 jullu 2020 (TATOLI)–Sekretária Estadu Igualidade Inkluzaun (SEII), Maria José da Fonseca Monteiru de Jesus, hateten SEII disponivél servisu hamutuk ho Ministériu Turizmu Komérsiu no Indústria (MTCI-sigla portugés) atu haree oinsá feto bele involve iha setór turizmu.

“Entaun, ami haree oinsá mak ba oin feto sira bele involve iha setór Turizmu Indústria ninian. Ami ko’alia mós oinsá agora MTCI halo, haree ba sítiu turístiku sira, oinsá mak feto sira bele hola parte no maluk sobrevivente pasadu sira bele mós hola parte iha setór turizmu ne’e rasik. SEII sei disponivél atu servisu hamutuk ho MTCI hodi asegura katak ita-nia polítika no programa sira hatán be nesesidade komponente hotu,” dehan dehan Maria José da Fonseca Monteiru de Jesus, ba Agência TATOLI hafoin hasoru malu ho V-MTCI iha Faról, Dili, segunda ne’e. 

Iha sorumutu ne’e, nia hateten, sira ko’alia kona-ba oinsá atu haree servisu sira ne’ebé mak Minsiteriu Turizmu Komérsiu Industria halo ne’e, tenke asegura sira-nia polítika, programa no atividade sira hotu ne’ebé sira implementa ne’e, hatán duni ba nesesidade komponente hotu ne’ebé durante ne’e SEII halo advokásia liuliu ba feto sira.  

Governate ne’e hatutan, tanba MTCI iha knaar boot ida haleu Timor laran tomak hodi haree ba setór Turizmu Komérsiu Indústria, entaun feto hanesan komponente boot, ba maluk ema ho defisiénsia no maluk orientasaun seksuál oin-oin, entaun sira tenke mós hola parte iha servisu importante ne’ebé MTCI halo no oferese ba timoroan sira.

Aleinde ne’e, nia haktuir, iha sorumutu ne’e SEII mós fahe dokumentu kona-ba promosaun Igualidade no Inkluzaun no dokumentu oin-oin ba MTCI atu sai referénsia ba sira-nia servisu.

“Ami mai fó hanoin nafatin ba malu oinsá ba oin sei presiza koopera hamutuk. Entaun, ami mai fahe mós dokumentu oin-oin ne’ebé MTCI presiza iha, atu sai hanesan referénsia ba servisu sira. Ba oin, atu hamutuk, ita bele halo promosaun Igualidade no Inkluzaun liuliu ba feto ho ema ho defisiénsia ka ema ho orientasaun seksuál oin-oin, komponente promosaun igualidade no inkluzaun ninian ne’ebé durante ne’e merjinalizadu,” nia dehan. 

Jornslista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here