Hakerek nain, Elidio Agusto Guterres.

(Reflesaun ba Kreximentu Demokrasia TL: Husik Fuan Haree Netik Ameasa Post-Truth)

Hosi

 Elidio Agusto Guterres

(Alumni Universidade Gadjah Mada-UGM)

Mudansa teknolojia iha era globalizasaun, hahoris mundu foun ba sosiedade atu habelar liberdade espresaun. Mídia dijitál no internet sai ruang publik (espasu públika) atu espresa hanoin, ideia no sentimentu. Individu hotu iha liberdade atu halo krítika ba realidade ne’ebé nia enfrenta. Mídia fó fatin no tempu ba ema hotu atu haree, sente, hatene aktu polítiku, ekonomia, sosiál, edukasaun, no seluk tan. Simplesmente, teknolojia dijitál no internet fó dalan ba sosiedade atu asesu informasaun no siénsia hotu. Maibé ida-ne’e la signifika laiha influénsia ka nia impaktu negativu.

Tuir Jenkins no Thorburn iha nia livru Democracy and New Mídia (2004: 8-11) hateten, mídia sosiál sai sosiedade foun ne’ebé partisipa iha prosesu sosiál no polítika. Realidade ida-ne’e hahoris sosiedade ne’ebé well informed, no ida-ne’e sai espasu ne’ebé pozitivu atu hamoris demokrasia. Maibé ida-ne’e la hatudu, laiha dezafiu ka problema. Informasaun ne’ebé sosiedade asesu iha internet, barak mak informasaun falsu ka hoax no barak mós informaaun ne’ebé loos. Simplemente, informasaun falsu no loos kahur sai ida. Tanba ida-ne’e, araska ba ita atu kontrola no hatene informasaun ne’ebé loos no sala. No, ida-ne’e fó posiblidade ba sosiedade asesu no habelar hoax ka lian falsu ne’ebé iha espíritu atu hamosu konflitu. Informasaun ne’ebé loos ita bele dehan sala no informasaun ne’ebé sala ita dehan loos (https://www.radartasikmalaya.com/).

Timor-Leste, nu’udar nasaun ne’ebé ukun-aan iha era ne’ebé avansadu ho teknolojia no agora tama ona iha teknolojia 4.0, la sees hosi dezafius no impaktu negativu hosi modernizasaun teknolojia ida ne’e. Ita bele dehan, sosiedade (joven) no polítiku barak mak uza teknolojia dijitál no internet la tuir nia dalan ne’ebé loos. Mídia la sai mundu atu espresa kreatividade, krítika pozitivu ba aktu polítika, ekonomia, edukasaun, no asesu informasaun foun atu dezenvolve rekursu umanu no demokrasia, maibé sai mundu atu habelar lia falsu ka Hoax (fake news). Realidade hatudu, hoax sai sasán propaganda iha prosesu demokrasia. Espesialmente iha konstentasaun polítika atu hadau ukun ka kadeira. Ida-ne’e mak sai dezafiu boot ba demokrasia iha tempu agora. La’ós Timor-Leste de’it mak enfrenta realidade ida-ne’e, maibé mundu tomak. Pergunta mai ita mak, preparadu ona ka ita atu hasoru realidade ida-ne’e? Realidade ne’ebé informasaun “loos” ita bele dehan “sala” no “sala” ita bele dehan “loos”, ne’ebé ema barak hanaran erru post-truth ka pasca-kebenaran ka hafoin-lia loos.

Saida Mak Post-Truth?

Post-truth liafuan ida ne’ebé famozu tebes iha tempu kontemporánea. Nasaun barak mak ko’alia no preokupa ho era post-truth. Ezemplu nasaun viziñu Indonesia, halo peskiza no estudu ne’ebé kle’an atu hatene saida mak post-truth no nia impaktu sira. Post-truth la’ós termu ne’ebé foun. Jurnál ka artigu no libru barak mak sira prodús kona-ba post-truth. Post-truth sai dezafiu ida mós ba moris sosiedade, demokrasia, nst.

Iha Timor-Leste, barak hosi ita mak seidauk iha informasaun ne’ebé klean kona-ba post-truth. Tanba ida-ne’e, molok atu fahe reflesaun kona-ba post-truth ho nia inpaktu sira, liuliu ba demokrasia, permite me atu hatene saida mak post-truth.

Steve Tesich, ema primeiru ne’ebé uza lifuan post-truth iha nia artigu “The Goverment of Lise” iha revista The Nations ne’ebé públika iha 6 Janeiru 1992. Iha nia artigu ne’e, nia hateten sosiedade la preokupa ho realidade ne’ebé ho objetivu no loos. Sentimentu no opiniaun privadu sai númeru ida duké lia-loos. Depois Steve Tesich, Ralph Keyes iha nia livru “The Post-Truth Era: Dishonesty and Deception in Contemporary Life, ne’ebé públika iha tinan 2004, habelar no halo populár liután liafuan post-truth. No, iha tinan 2016, Universidade Oxford, hatuur liafuan post-truth sai “word of the year” tanba situasaun sosiál no polítika iha USA hatudu katak, ema barak mak uza sentimentu no interpretasaun privadu hodi halakon realidade ne’ebé objetivu ho lian falsu iha konstelasaun polítiku. No, peskiza hatudu Prezidente USA, Donald Trump, ema ne’ebé habelar hoax barak liu iha nia kampaña polítika (Cosmas Eko Suharyanto, 2019: 38).

Tuir disionáriu Oxford, post-truth hanesan situasaun ka klima ne’ebé faktu ka realidade la sai fundamentu opiniaun públika. Sentimentu no opiniaun privadu importante liu realidade ka faktu sira. Ema hotu bele halo opiniaun no interpretasaun ba faktu sira. Tanba ne’e, saida mak ita haree no rona iha públika la’ós faktu siras ne’ebé ho objetivu maibé opiniaun no sentimentu privadu ne’ebé kahor ho interese privadu ka grupu sira nian.

Se ita haree post-truth iha sikun terminolojia, Post-truth mai hosi lian Inglés. Post, signifika katak after (setelah) ka depois no truth signifika katak kebenaran ka lia-loos. Tanba ne’e, post-truth signifika pasca kebenaran ka depois lia-loos (Cosmos Eko Suharyanto, 2019: 39). Depois terminolojia ida-ne’e ema hanaran era post-truth ka era postu lialos. Era ida-ne’ebé lia-loos, rasionalizmu no objetivu la sai fundamentu ba opiniuan públika. Era ne’ebé sentimentu, sensasionál no fiar privadu, ita bele dehan, sai lejitimidade ba opiniaun públika. Tanba ne’e, hoax ka lia falsu domina iha espasu públika ka ruang publik foun ne’ebé ita hakaran mídia. No, Haryatmoko hatutan hoax/fake news ka lia falsu oan hosi post-truth (Haryatmoko, 2018).

Imajen Simples Post-Truth, Hoaks no Mídia Sosiál

Molok atu soe matan ba saida mak akontese iha Timor-Leste, mai ita koko haree imajen post-truth ne’ebé akontese oan iha nasaun seluk. Bainhira ema ko’alia kona-ba post-truth no hoaks, ema sempre soe matan ba nasaun USA, liuliu ba aktu hirak ne’ebé, Donald Trump, halo iha kampaña prezidente 2015. Tanba ida-ne’e, ha’u koko atu soe netik matan ba imajen iha USA.

Cosmos Eko Suharyanto, iha nia jurnal “Analisis Berita Hoaks di Era Post-Truth” nia deklara katak imajen post-truth hahú ho momentu importante, kampaña Prezidente Donald Trump. Iha momentu ne’e, ema barak mak habelar informasaun falsu ka hoax iha mídia sosiál ba sosiedade no aktu ne’e fó impaktu makaas ba opiniaun públiku

Durante kampaña, Trump sempre uza informasaun falsu ka hoax hanesan, hateten Obama no Hillary sai fundasaun ISIS, iha imigrante ilegal juta 30 no iha deportasaun massal, nst. Bainhira lia falu ka hoax ne’e soran no resposta ho faktu, Trump ho nia grupu responde katak ida-ne’e la’ós hoax maibé “alternative facts.” La satisfás ho atitude polítika Trump, New York Times hatún informasaun ho triste katak “we have entered an age of post-truth politics.” Peskiza ida hosi PolítikaFact deklara katak, 70% hosi esteitmentu Trump lia falsu ka hoax. Tanba, aktu hirak ne’e, Trump hetan títulu Lie of The Year 2015 No 2017.

Imajen post-truth ne’ebé Trump hatudu iha leten, sai imajen ida hosi imajen sira seluk iha nasaun seluk. Se ita haree tan imajen post-truth, realidade hatudu momoos katak nasaun barak mak iha problema ida-ne’e. Viktoria Prego, Prezidente Madrid Press Asociation, hateten nasaun hotu-hotu iha realidade hasoru erru post-truth. Ema barak mak habelar no hatutan informasaun falsu, no aktu ida-ne’e sai faktu ne’ebé interompe laju demokrasia. Informasaun ne’ebé loos no objetivu susar atu ita bele hetan iha mídia sosiál.

Rezultadu peskiza “Masyarakat Telematika (Mastel)” iha tinan 2017, hatudu katak iha nasaun viziñu, Indonesia,  iha informasaun falsu ka hoax 92,40% ne’ebé sosiedade asesu no hetan hosi mídia sosiál hanesan Facebook, Twitter, Instagram no Path. Iha sorin seluk, iha 62,80% sosiedade asesu no simu informasaun falsu hosi WhatsApp, Line, Telegram, no iha 34,90% liuhosi situs Web. No iha tipu informasaun, 91,80% informasaun hoax kona-ba problema polítika no sosiál (eleisaun prezidente ka kona-ba programa Governu), 88,60% informasaun hoax kona-ba SARA/trata ka hotar. No pursentu Informasaun hoax aumenta makaas iha tinan 2019, bainhira tempu kampaña no eleisaun prezidente no vise Prezidente, Indonesia. Redasaun Kompas públika artigu ida ho titlu ”Lunturnya Kearifan Berpolitik di Era Post-Truth,” ne’ebé deklara katak Indonézia mós la sees ka leet hosi impaktu ka bele dehan dezastre era post-truth (Cosmos Eko Suharyanto, 2019: 41).

Demokrasia TL no Post-Truth

Imajen post-truth iha leten ne’ebé hatudu nasaun avansadu no forsa hanesan, Amerika, ita bele temi mós Indonézia, ne’ebé hetan impaktu makaas hosi post-truth ba sira-nia kreximentu demokrasia, sai sinál ida mai ita atu haree no hahú refleta ita-nian. Timor-Leste, nu’udar nasaun nurak ne’ebé ukunan iha tempu mileniu (sekulu 21), iha tinan 2002, ha’u fiar katak sei la ses husi ameasa post-truth.

Atu hatene no hatete klaru pursentu informasaun hoax ne’ebé durante ne’e naklekar iha Timor Leste, ha’u pesoalmente seidauk iha peskija ka estudu ne’ebé fó informasaun klaru ba iha problema ida ne’e. Maibé se ita haree no analiza realidade hirak ne’ebé ita enfrenta agora, Timor Leste, mos agora dadaun hetan ameasa makaas husi impaktu era post-truth. Iha mídia sosiál, liu-liu facebook, ita haree informasaun falsu ka hoax barak mak naklekar iha beranda mídia, no sosiedade barak mos hafahe ka hatutan informasaun falsu sira. Ezemplu, imformasaun kona-ba osan falsu, Bou Nai Mori prontu sai husi relijiaun Katólika, informasaun kona-ba pasiente nain lima ne’ebé pozitivu covid-19 iha hospital Kariadi, 1 mate; no informasaun falsu sira seluk ne’ebé ita hetan ka asesu iha mídia sosiál.

Realidade hatudu momos, ita nia sosiedade seidauk iha mentalidade atu hatene informasaun ne’ebé sira asesu ho rasionalismu. Sentimentu no opiniaun privadu tau iha fatin primeiru, no informasaun ne’ebé ita asesu husi mídia, ita la analisa didiak ho rasionalismu. Se ita haree klean liutan realidade ne’ebé ita enfrenta, mídia sosiál sai dalan murak atu halo polítika. La sente, polítiku barak sai “agent” ba disinformasaun.

Informasaun barak mak naklekar ho intensaun no sentimentu privadu no partikulár, ho objetivu atu hetan apoiu. Informasaun no opiniaun barak mak ema polítiza atu halo loos no hametin aktu no argumentu polítika. Bainhira informasaun sira ne’e sai iha públika, sosiedade la tetu no haree ho didiak, no habelar ka hatutan liutan iha mídia. Pior liu, sosiedade simu informasaun sira ne’e sai informasaun ne’ebé loos no justu. La sente, realidade no mentalidade ne’ebé ema hanaran erru post-truth buras ona iha ita nia sosiedade nasaun joven ida ne’e.

Nu’udar nasaun  demokrasia, pergunta simples ne’ebé ita tenke husu mak ida ne’e. Realidade era post-truth ne’ebé ita hasoru ameasa ita nia kreximentu demokrasia ka lae? Tuir Dr. Yohanes Haryatmoko, S.J., Dosente Filsofia Universidade Sanata Dharma, hateten post-truth fó ameasa boot ba demokrasia. Manipulasaun faktu tama iha valór, argumentu no opiniaun, tanba ne’e sosiedade araska atu hatene informasaun ne’ebé loos no falsa. Prodús informasaun atu hetan ka atake emosaun sosiedade hodi haloos lia falsu. Haryatmoko hatutan mos objetivu husi aktu ida ne’e atu soran sosiedade no hetan massa iha polítika (Haryatmoko, 2017).

Se ita haree ralidade agora ho hanoin ne’ebé klean, ha’u aseita ho pensamentu Dr. Haryatmoto, Sj, no ha’u atu hateten erru post-truth ameasa tebes demokrasia iha Timor Leste. Iha mídia sosiál, liu-liu iha facebook, hoax ka lian falsu barak mak naklekar iha beranda mídia. Lian hotar, argumentu no esteitmentu má-atitude, informasaun polítika ne’ebé iha intensaun hetan votu ka masa iha eleisaun, informasaun no opiniaun ne’ebé iha espíritu hasoran, hatuur sentimentu, opiniaun privadu no analiza privadu ba realidade sai lia loos, iha mos klaim opiniaun, manipulasaun faktu to’o públika araska atu hetan no hatene nia falsu. Realidade hirak ne’e moris buras iha sosiedade demokrasia nia leet. Ita bele dehan, iha ambiente ne’ebé sosiedade bele simu lian falsu do que faktu ka lia loos.

Simplesmente, liu husi internet no mídia sosiál ema hotu bele asesu, prodús no habelar informasaun ho nia sentimentu no opiniaun privadu ba grupu no ema ne’ebé nia hakarak. Problema ne’ebé ita enfrenta iha sosiedade demokrasia mak, informasaun ne’ebé ita asesu no habelar, ita seidauk hatene ka konfirma nia loos. Realidade hatudu momos dala barak ema polítiza informasaun no habelar lian falsu sai instrumentu propagandu ida atu hetan objetivu polítika ne’ebé sira hatuur. Sira hamosu opiniaun pozitivu atu hatudu aktu pozitivu no interompe structure of feeling no emosasun sosiedade hodi bele mobiliza votu ka masa iha sosiedade. Iha mos opiniaun negativu, black campaign no hate speech hodi soran no atake ninia inimigu polítiku.

Se ita haree polítika iha Timor Leste, polítiku barak mak hatudu aspetu negativu hosi grupu polítiku seluk do que pozitivu, no la apresia aktu pozitivu ne’ebé polítiku hosi grupu seluk halo iha mundu. Mídia sosiál sai mundu habelar polítika “falsu”. Exemplu simples ne’ebé ita asisti no haree agora mak, membru hosi partidu Fretilin duun ka hatete aspetu negativu husi CNRT, no CNRT hatete aspetu negativu husi Fretilin. Argumentu no opiniaun ne’ebé sira públika iha mídia, argumentu ne’ebé hatun no haree aspetu negativus la’ós aspetu pozitivu. Aktu sosiál ne’ebé lider seluk halo, haree ho matan no sentimentu polítika, no hahú hahoris opiniaun polítika. Aktu hirak ne’ebé lider ka polítiku seluk halo, maneira polítika atu hetan masa ka votu. Nunka haree aspetu pozitivu husi aktu karidade. Aktu hotu haree ho sentimentu polítika.

Se ita haree didiak, espesialmente ha’u, araska atu hetan grupu ka partidu iha Timor-Leste, apresia aspetu pozitivu hosi grupu ka partidu seluk ne’ebé susesu halo rai Timor nia naran morin. La to’o iha ne’e. Se’e ita analiza informasaun sira iha mídia sosiál, informasaun hotar no trata lider partidu no nai ulun sira, la’ós barak hosi povu ai-leba maibé barak hosi membru no lider partidu seluk (lawan politik). Iha erru post-truth ida ne’e, faktu la sai baze polítika. Lian falsu bele sai lia loos. Opiniaun ne’ebé polítiku sira kuda la’ós tuir realidade maibé liu husi maneira manipulasaun.

Iha kondisaun ka situasaun hanesan ne’e, demokrasia no polítika hanesan area konfrontu hadau poder ka ukun ho maneira ka dalan oioin, inklui hoax, black campaign no hate speech; sai kilat ne’ebé diak atu oho inimigu polítika. Tanba ida ne’e, realidade ne’ebé mosu mak sentimentu odiu, hirus, ne’ebé hamosu konflitu no disintegradu sosiál, ne’ebé hasees demokrasia husi valór étiku no morál. Tuir loloos, demokrasia tenke hatuur valór civility, tanba idea bázika hosi demokrasia mak hamosu sosiedade ne’ebé avansadu. Informasaun falsa ka hoax, black campaign, no hate speech sai parasitu ka virus ne’ebé hamihis imunidade demokrasia, no to’o nia tempu demokrasia sei mate tanba virus hirak ne’e. Ida ne sai dezafiu boot ida ba demokrasia iha era post-truth atu metin nafatin ho valór lia loos.

Durante tinan tolu nia laran (impasse polítika), mídia sosiál sai palku habelar hoaks, hate speech, black campaign, entre lider partidu polítiku. Rezultadu hosi aktu hirak ne’e mak ita bele dehan meza iha PPN rahun. La para iha ne’e, hirus malu, rasismu, to’o agora sei kontinua mosu. Mídia sai dalan diak kontinua hatudu teatru polítika hodi hasoru inimigu polítika (lawan politik) ho sentimentu no opiniaun privadu no partikulár. Povu sai penonton setia haree aktu hirak ne’e iha mídia, no povu ka sosiedade ne’ebé mak pro no kontra aktu hirak ne’e, sei tau netik liafuan no hatutan informasaun hirak ne’e iha mídia tuir sira nia sentimentu, analiza, no opiniaun privadu. Ita bele dehan, ema ne’ebé hamosu hoax, hate speech no black campagaing, barak iha mídia mak polítiku sira ne’ebé hadau poder. No realidade agora ne’ebé hamihis tan demokrasia iha era post-truth mak, Governu hamos-án no halutu-án hodi hamosu lei kriminaliza difamasaun, hodi redús liberdade espresaun atu krítika atitude ka aktu polítiku sira. Pergunta ba ita mak, sé mak hamihis demokrasia iha erru post-truth? Povu ai-leba ka membru no lider partidu polítiku sira? Se haree realidade hirak ne’ebé akontese, ha’u bele dehan, autór ne’ebé hamihis demokrasia iha erru post-truth mak lider no membru partidu polítiku, no apoiante sira ne’ebé fanatiku ho partidu ne’ebé sira tuir. La’ós povu ai-leba. Tanba realidade hatudu momos, autór ne’ebé hamosu, habelar no hatutan hoax, hate speech no black campaign, hodi hametin aktu polítika ho sentimentu, opiniaun no analiza privadu mak, dala ida tan, lider, membru no apoiante fanatiku partidu polítiku sira ne’ebé hadau poder.

Nu’udar jerasaun foun (joven), dalan saida mak ita tuir atu rezolve no hasoru impaktu erru post-truth? Esbosu lei kriminaliza defamasaun ne’ebé governu prepara atu hasee bele resposta no hapara dezafiu erru post-truth hodi hametin demokrasia iha Timor Leste? ##Iha artigu tuir mai sei ko’alia kona-ba oinsá hasoru erru post-truth.**

Bele halo diskusaun ho eskritór liu hosi mídia:

FB: Elidio Agusto Guterres

Email: surimetan@gamail.com

Hp: 78459588

HAKEREK NO HATÁN

Please enter your comment!
Please enter your name here