Enkontru Primeiru-Ministru, Taur Matan Ruak hamutuk ho Ministru Obra Públika, Salvador Eugênio dos Reis Pires hamutuk ho dirijente sira, iha Palásiu Governu, segunda (20/07). Imajen/GPM

DILI, 20 jullu 2020 (TATOLI) – Primeiru-Ministru (PM), Taur Matan Ruak, konvoka enkontru ho Ministru Obra Públika, Salvador Eugênio dos Reis Pires hamutuk ho dirijente sira iha Ministériu Obra Públika (MOP) hodi ko’alia kona-ba programa ministériu ne’ebé la’o hela inklui utilizasaun Dotasaun Orsamentu Temporáriu (DOT).

Iha biban ne’e, Xefe Governu enkoraja MOP hodi utiliza DOT ho másimu hodi responde ba preokupasaun públiku nian ne’ebé pertinente tebes hanesan bee-moos, eletrisidade no estrada.

“Ha’u mai ho ekipa kompostu hosi Diretór Jerál Agua no Saneamentu, Estrada no mós Eletrisidade. Tanba agora ita sei iha rejime doudesimál maka Primeiru-Ministru enkoraja MOP atu kontinua presta servisu ba nesesidade públika tanba iha ámbitu dotasaun temporáriu ita iha problema barak. Tanba ne’e, Primeiru-Ministru enkoraja nafatin ami-nia ekipa atu kontinua serbisu iha terrenu hodi atende preokupasaun povu nian,” tenik Ministru  Salvador, hafoin hasoru malu ho PM Taur, iha Palásiu Governu, segunda ne’e.

Iha reuniaun ne’e, governante ne’e no ekipa aprezenta mós preparasaun Orsamentu Jeral Estadu (OJE) MOP nian ho planu prioridade iha tinan 2021.

Planu prioridade MOP nian iha 2021 mak estrada rurál, eletrisidade sira ba suku ne’ebé seidauk asesu ba enerjia eletrisidade no bee-moos.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here