Primeiru-Ministru, Taur Matan Ruak delega kompeténsia serbisu ba ninia vise na’in-rua, iha segunda (20/07), iha Palásiu Governu. Imajen/GPM

DILI, 20 jullu 2020 (TATOLI) – Primeiru-Ministru (PM), Taur Matan Ruak delega ona kompeténsia serbisu ba Vise Primeiru-Ministru na’in-rua.

Vise Primeiru-Ministru no Ministra Solidariedade Sosiál, Armanda Berta dos Santos, hetan kompeténsia serbisu iha área sosiál, edukasaun, no saúde, enkuantu Vise Primeiru-Ministru no Ministru Planu Ordenamentu, José Maria dos Reis, ninia kompeténsia serbisu mak iha área infraestrutura nian hanesan, transporte, komunikasaun inklui planeamentu no ordenamentu territóriu.

“Ohin Primeiru-Ministru konvida ha’u ho Vise Primeiru-Ministru Armanda, hodi hato’o mai ami delegasaun podér balun iha área sira,” relata Vise PM, José Maria dos Reis hafoin ramata enkontru ho PM Taur iha Palásiu Governu, segunda ne’e.

Vise Primeiru-Ministru, Armanda Berta dos Santos, hateten nia parte sei haka’as-an hodi serví ho di’ak ba kompeténsia sira ne’ebé delega.

“Ha’u nia knaar mak haree ba asuntu sosiál ninian, ne’ebé akumula mós edukasaun, saúde inklui mós ministériu solidariedade rasik atu haree servisu sosiál ninian hodi superviziona ba serbisu ne’ebé entre liña ministeriál sira durante mandatu,” dehan Vise PM Armanda Berta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here