Anita Gusmão, tinan 20, tara-an iha ninia kuartu-laran iha Aldeia Mota Ki’ik, Suku Hera, Postu Administrativu Metinaro, Munisípiu Dili. Imajen/Espesiál.

DILI, 20 jullu 2020 (TATOLI)- Estudante feto ida ho naran Anita Gusmão, tinan 20, ohin, tara-an iha ninia kuartu-laran, Aldeia Mota Ki’ik, Suku Hera, Postu Administrativu Metinaro, Munisípiu Dili.

Tuir informasaun ne’ebé Agêncía Tatoli rekolla iha terrenu katak, vítima Anita Gusmão, hili dalan hakotu nia vida liuhosi tara-an, tanba deskonfia sofre psikólojia, hafoin partu iha loron tolu liubá.

Iha akontesimentu ne’e, parte família kontaktu kedas Polísia Eskuadra Metinaro liuhosi Ofisiál Polísia Suku (OPS) no  too kedas iha fatin hamutuk ho família salva bebé ne’ebé matebian husik hela iha kuartu-laran no halo kedas investigasaun iha fatin akontesimentu.

Polísia Forensik Investigasaun Kriminál Munisípiu Dili ne’ebé too kedas iha fatin hodi halo levantamentu terrenu deskonfia vítima tara-an iha tuku 14:45 Otl. Vítima uza kamiza mean no kalsa metan tara-an mate ho kondisaun tali aperta metin iha kakorok besik kedas odamatan ne’ebé vítima xave metin ona.

Familia sira foin hatene katak, vítima mate, hafoin vítima nia oan bebé tanis maka’as iha kuartu-laran, nune’e família sira tenta loke odamatan no janela ne’ebé xave metin no ikus mai sira sobu janela hodi tama salva  uluk bebé ne’e.

Agêncía Tatoli tenta konfirma kazu ne’e ba  Komandante Eskuadra Becora, seidauk bele fó komentáriu tanba sei hein prosesu investigasaun.

Mate isin rasik, PNTL lori kedas ba Ospitál Nasionál Guido Valadares (HNGV) hodi hala’o autópsia no buka hatene motivu loloos hosi kazu tara-an ne’e.

Jornalista   : Eugénio Pereira

Editór        : Francisco Simões

2 KOMENTÁRIU

HAKEREK NO HATÁN

Please enter your comment!
Please enter your name here