Segundu Komandate PNTL Munisípiu Dili, Superintendente Asistente Xefe, Euclides Belo. Imajen/Eugénio Pereira

DILI, 20 jullu 2020 (TATOLI) – Motorista bis nian na’in-rua, domingu (19/07), iha Terminal Becora, Dili, hatudu forsa ba malu hodi lori kro’at  no halo ema lubun iha terminal laran hakfodak no balu trauma.

Notísia Relevante : OPS no KPK Sei Tama-Sai Bairru Sensibiliza Programa Dame

Segundu Komandante Polísia Munisípiu Dili, Superintendente Asistente Xefe Euclides Belo, hateten, Polísia Eskuadra Becora halo ona investigasaun ba kazu motorista bis na’in-rua ne’e no rekolla informasaun preliminaria katak, motorista na’in-rua ne’e lori kro’at ba malu tanba deskonfia  hadau malu pasajeiru.

Euclides Belo dehan, bainhira kazu ne’e akontese, PNTL no ekipa membru Konsellu Polisiamentu Komunitáriu (KPK) too kedas fatin hodi halo atuasaun no kaptura motorista na’in-rua no halo mós apreensaun ba sasán kro’at no bis rua ne’e hodi submete hotu ba investigasaun..

“Polísia Investigasaun Kriminál sei haree hela bis ne’e hosi diresaun ne’ebé nian, depois maka ekipa relata mai komandu no ami bele enkamiña ba Ministériu Públiku,” informa Euclides Belo, ohin, ba jornalista iha Komandu PNTL  Munisípiu Dili.

Nia hatutan, asaun ne’ebé motorista na’in-rua halo nu’udar krime presiza rezolve tuir lei hodi evita kazu ne’e labele akontese tan iha futuru.

Euclides rekoñese, problema sempre mosu beibeik iha Terminal Becora, tanba fatin ne’e kloot labele fó espasu ba bis, angguna no mikolate ne’ebé mai hosi parte Manatuto, Baucau, Lautem no Viqueuque, ne’ebé 400-resin maka loroloron halo movimentu ba mai.

Atu evita problema mosu beibeik, Euclides dehan, PNTL kontinua asegura nafatin seguransa iha área ne’ebá no husu komprensaun ba motorista sira atu labele hamosu problema.

Nafatin Buka Tuir Autór Rama Ambon  

Iha parte seluk, Euclides dehan, Polísia Munisípiu Dili kontinua koordena ho Ofisiál Polísia Suku (OPS) no autoridade lokál buka tuir nafatin autór deskoñesidu ida ne’ebé lori rama ambon hana kanek vítima, Agostinho da Silva, tinan 30, iha área Hodi-Laran, Suku Bairru-Pité Dili.

Kazu hana vítima Agostinho ne’ebé hela iha área Ai-mutin, Dili, akontese iha segunda (13/07), kuaze tuku 20:00, bainhira vítima lori fo’er husi Loja Xineza nian ne’ebé nia servisu atu ba soe.

Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here