Ministru Edukasaun Juventude no Desportu, Armindo Maia.Imajen/Antonio Goncalves

DILI, 20 jullu 2020 (TATOLI)-Ministru Edukasaun Juventude no Desportu (MEJD), Armindo Maia, ho Embaixadora Estadus Unidus Amérika, Kathleen M. Fitzpatrick, nafatin iha kompromisu atu implementa  kooperasaun iha área importante haat hanesan formasaun ba profesór sira, formasaun língua inglés, reabilitasaun eskola no merenda eskolár.

Governu Timor-Leste liuhosi Eis Ministra Dulce de Jesus Soares ho Embaixadora Estadus Unidus Amérika, Kathleen M. Fitzpatrick, maka asina ona MoU ida hodi implementa programa priioridade haat ne’e.

Notísia Relevante :Forsa Navál EUA Kompleta Projetu 100 iha Timor-Leste

Husi programa haat ne’e, Ministru Armindo Maia, hateten formasaun lian inglés maka daudaun ne’e paradu provizóriu tanba formadór sira fila hikas bá sira-ninia nasaun Amérika hafoin mosu pandemia globál surtu COVID-19 iha Timor-Leste.

“Agora programa ne’e sei suspende hela, ita sei haree fali bainhira situasaun ne’e mak normaliza hikas ita sei kontinua fali programa ne’e,”dehan Ministru Armindo Maia, ba TATOLI, hafoin halo enkontru kortejia ida ho  Embaixadora Estadus Unidus Amérika, Kathleen M. Fitzpatrick, edifísiu MEJD, Vila Verde, segunda ne’e.

Iha biban hanesan Embaixadora EUA Kathleen M. Fitzpatrick, hateten objetivu husi kooperasaun ne’e atu aselera prosesu dezenvolvimentu liliu iha área edukasaun iha Timor-Leste.

“Apoiu ida ne’e Estadus Unidus Amérika  halo uza ninia osan rasik ho intensaun atu lori edukasaun iha Timor-Leste bele avansa liután ba futuru  liuhusi ninia rekursu umanu sira adekuadu, infrastrutura kualidade no estudante sira bele hetan apoiu nutrisaun ida diakliu,”tenik Kathleen Fitzpatrick.

Notísia Relevante :EUA Informa Sira-Nia Apoiu ba PM Taur Matan Ruak

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here