DILI, 20 jullu 2020 (TATOLI) — Komisaun A (Justisa no Konstitusionál) aprezenta ona projetu-lei Medida Prevensaun no Kombate Korrupsaun (MPCC) ho artigu hamutuk 118 ba plenária, Parlamentu Nasionál.
Komisaun A ne’ebé trata asuntu Justisa no Konstitusionál ne’e aprezenta relatóriu finál Projetu-Lei númeru 1/V(1a) Medida Prevensaun no Kombate Korrupsaun ba plenária, ohin.
“Ohin, Komisaun A mai aprezenta ba Parlamentu Nasionál testu finál kona-ba medida prevensaun no kombate korrupsaun nune’e plenária bele foti desizaun,” Prezidente Komisaun A, Deputadu Joaquim dos Santos, informa liuhosi plenária, segunda ne’e.
Lei Komplementár Apoia MPCC Depende Ba Vontade Membru Deputadu no Governu
Hafoin Komisaun A halo aprezentasaun, Prezidente Parlamentu Nasionál, Deputadu Aniceto Guterres, konsidera testu finál lei ne’e hetan aprovasaun kuaze totalmente konsensuál no to’o oras ida-ne’e meza seidauk simu rekursu ka rekerimentu abertura ruma kona-ba testu ne’e.
“Tanba prosesu diskusaun mós naruk, membru komisaun sira konsege intende malu, rona malu tanba ne’e testu ida-ne’e ha’u konsidera testu konsensuál, sei la fó tan tempu atu hato’o rekursu. Testu ne’e prontu ona atu avansa ba hetan votasaun iha finál globál,” tenik Aniceto Guterres.
Tuir relatóriu no pareser ne’ebé Agência TATOLI asesu, projetu-Lei númeru 1/V(1a)) Medida Prevensaun no Kombate Korrupsaun ne’e kompostu hosi artigu 1 (objetivu) ne’ebé prevé iha kapítulu I (medida jerál prevensaun). Sesaun I (Estratéjia Nasionál) ne’ebe define artigu 2 (polítika prevensaun no luta kontra korrupsaun).
Sesaun II (Setór Públiku no Kódigu Konduta) kompostu hosi artigu 3 (rekrutamentu iha setór públiku), artigu 4 (kódigu konduta ba ajente públiku no privada sira), artigu 5 (medida ne’ebé fasilita komunikasaun atus korrupsaun) no artigu 6 (medida relativa ba partidu polítiku sira).
Sesaun III (Kontratasaun iha Setór Públiku) kompostu hosi atigu 7 (publisidade no transparénsia aprovizionamentu iha setór públiku) no artigu 8 (aprovizionamentu justu no efisiente).
Sesaun IV (tranparénsia iha administrasaun públiku) define artigu hamutuk lima (5), sesaun V (integridade hosi judisiáriu no redusaun opurtunidade korrupsaun) define artigu hamutuk lima (5) , sesaun VI (setór privadu) define artigu hamutuk lima (5), sesaun VII (partisipasaun iha sosiedade) define artigu hamutuk tolu (3).
Purtantu Kapítulu I ko’alia kona-ba rejime deklarasaun bens no interese, define artigu 1 (ida) kona-ba finalidade.
Agência TATOLI halo rejumu, katak projetu-Lei númeru 1/V(1a)) Medida Prevensaun no Kombate Korrupsaun artigu 1 (objeitvu) to’o artigu 118 (entra iha vigór). Iha artigu 118 define nune’e “a presente lei entra em vigór 180 dias após sua publicacão”.
Oras ne’e daudaun, Parlamentu Nasionál tama diskusaun hafoin halo votasaun finál ba projetu-lei MPCC ne’e. Bainhira hetan aprovasaun hosi PN sei enkamiña ba Prezidente Repúblika hodi halo promulgasaun.
Jornalista: Evaristo Soares Martins
Editór: Cancio Ximenes