Ilustrasaun hosi google.

DILI, 20 jullu 2020 (TATOLI)-Governu liuhusi Ministériu Edukasaun Juventude no Desportu (MEJD), planea ona sei servisu hamutuk ho Komisaun Nasionál Kombate HIV SIDA atu prodúz matéria kona-ba moras HIV/SIDA nune’e bele sensibiliza ba estudante sira  husi terseiru siklu ensinu báziku to’o sekundáriu atu oinsá halo prevensaun ba moras hada’et ne’e.

“Ami iha ona planu hamutuk ho Komisaun Kombate HIV SIDA atu haree hamutuk kona-ba programa sensibilizasaun ba ita-nia alunu sira liliu ba sira ne’ebé iha terseiru siklu ensinu báziku no esninu sekundáriu jéral,” dehan Vise Ministru Edukasaun Juventude no Desportu (MEJD), António Guterres, iha salaun ministériu Vila Verde,segunda ne’e.

Kestaun ne’e nia dehan, parte rua foin tama iha prosesu diskusaun tanba  ne’e maka seidauk deside loloos data fiksu ba ninia implementasaun.

Notísia Relevante :Estudante Sira Tenke Apoiu Kombate HIV-SIDA

“Ida ne’e ita foin ko’alia seidauk tama iha diskuasaun ida kle’an, ne’ebé ita seidauk hatene ninia implementasaun ne’e oinsá tanba tékniku liu ne’e ekipa sira husi Komisaun Kombate HIV SIDA mak hatene,”dehan tan.

Entretantu, Komisáriu Komisaun Nasionál Kombate HIV/SIDA,  Daniel Marçal, hateten antes tama iha ninia implementasaun Komisaun ho Governu liuhosi Ministériu Edukasaun Juventude no Desportu presiza separa  materia sensibilizasaun entre estudante terseiru siklu no ensinu sekundáriu.

“Tanba programa kombate HIV/Sida ne’e mak aseita ona hatama iha kurikulum presiza prepara halo didi’ak, tenki iha referensia barak liután inklui halo formasaun ba mestre sira oinsá atu lori materia ne’e,”hatutan.

Atu lori materia konaba HIV no edukasaun seksuál ne’e, tuir nia presiza liafuan própriu ida tekniku liu hodi halo esplikasaun, se lae inan-aman sira bele dehan profesór  sira hahú hanorin buat ladi’ak ba estudante sira.

Notísia Relevante :Juventude Hetan Virus Infeksaun HIV/SIDA Tanba Menus Informasaun

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here