Osan Dolar Amerikanu. Imajen/Google

DILI, 20 jullu 2020 (TATOLI) – Arguida ho inisiál DL tenke ba tur no hatán iha audiénsia julgamentu iha Tribunál Distritál Dili (TDD)  hodi responsabiliza ba nia aktu  empresta osan ho valor $1.365 hosi lezadu JAF.

Tuir loloos audiénsia julgamentu ne’ebé prezide hosi juiz singular Ana Paula, hala’o ohin, maibé seidauk bele halo tanba kazu refere nia natureza keixa kontra keixa. Tanba ne’e mak Tribunál husu atu junta tan autos ba prosesu seluk para Tribunál deside hodi halo julgamentu.

Tribunál deside adia julgamentu ne’e ba fali iha loron 25 setembru, tinan ne’e, iha tuku 11:00 otl.

Tuir faktu ne’ebé arrola hosi Ministériu Públiku (MP) katak, iha loron 13 janeiru 2018, lezadu foti osan $1.365 hodi entrega iha arguida iha nia uma, nune’e arguida promete katak fulan rua mak osan foin tama, tanba sei prosesu hela. Maibé to’o iha fulan ne’ebé promete arguida la selu ho razaun Governu seidauk la’o loos.

Mezmu nune’e Lezadu tenta husu beibeik osan refere ba arguida to’o mai ohin loron, arguida laiha resposta ne’ebé klaru, nune’e lezadu ba fó hatene Xefe Suku Kulu-hun, Dili, hafoin ne’e arguida promete tan perante Xefe Suku no Xefe Aldeia nia oin katak, sei selu lezadu nia osan iha loron 18 agostu 2018, maibé to’o loron ne’ebé promete arguida la selu nafatin lezadu nia osan, arguida dezempregada no la servisu ona iha Komisaun Uniaun Europeia.

Konsekuénsia hosi hahalok arguida nia ne’e halo lezadu hetan prejuizu ho valor $1.365.

Ho hahalok ida ne’e, arguida DL hanesan autór ba material ho forma konsumada, pratika krime ida Burla Simples ne’ebé previstu no punidu tuir artigu 266 husi Kódigu Penál.

Prosesu julgamentu ne’e MP reprezenta hosi prokuradór Claúdino Ximenes, arguida hetan asisténsia legal hosi defensór Públiku José Humberto Alves.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here