Ministru Asuntu Parlamentár no Komunikasaun Sosiál, Francisco Jerónimo, halo mediasaun entre Reprezentante Petisionáriu, CI no AJTL, iha Salaun PKM, Palásiu Governu, segunda (20/07). Imajen Tatoli/António Gonçalves

DILI, 20 jullu 2020 (TATOLI)Relasiona ho petisaun ne’ebé asina hosi jornalista na’in-31 kona-ba prosesu eleisaun ba reprezentante Asosiasaun Jornalista Timor-Leste (AJTL) iha Conselho de Imprensa (CI), Ministériu Asuntu Parlamentár no Komunikasaun Sosiál (MAPKOMS) fasilita tan diálogu daruak entre rezprezentante petisionáriu, CI inklui estrutura AJTL hodi buka solusaun.

Hafoin diálogu ramata, Ministru Asuntu Parlamentár no Komunikasaun Sosiál, Francisco Jorónimo, hateten diálogu ohin nu’udar diálogu ikus no nia parte sei hein pozisaun hosi parte tolu, liuliu petisionáriu sira.

Ministru Asuntu Parlamentár no Komunikasaun Sosiál, Francisco Jerónimo. Imajen Tatoli/António Gonçalves

“Diálogu maka ne’e ona, laiha tan diálogu. Posizaun maka hotu-hotu rekoñese iha buat balun sala, maibé parte petisionáriu sira hateten sei hasoru malu ho sira-nia kolega seluk hafoin sei haruka karta ida mai ha’u kona-ba posizaun sira-nian, maibé atu halo tan diálogu laiha ona,  dialogu ramata ona. Agora hein de’it posizaun hosi petisionáriu nian,” tenik Ministru Francisco hafoin halo mediasaun iha salaun Prezidénsia Konsellu Ministru, Palásiu Governu, segunda ne’e.

Notísia Relevante: Jornalista Na’in-31 Hatama Petisaun Ba PPN Tanba Kestiona Legalidade Prosesu Eleisaun

AJTL Husu PN Atu Anula Petisaun Jornalista 31

Governante ne’e haktuir, parte CI no sira seluk laiha problema no sira prontu hein desizaun.

“Hosi parte petisionáriu maka husu fali tempu ba sira atubele foti desizaun ikus, nune’e bele haruka karta ida mai ha’u katak sira hakarak kontinua nafatin ba Tribunál ka ba parte ne’ebé kompetente, ka deside hakotu entaun quer dizer desizaun maka ne’e ona no haree fali ba oin saida maka bele hadi’a,” nia subliña.

Nia dehan, desizaun ikus petisionáriu sira sei haruka karta ba MAPKOMS inklui CI hodi afirma sira-nia desizaun ikus.

Iha fatin hanesan, Inisiadór Petisaun no Reprezentante Petisiáriu, Noemio Falcão, agradese ba MAPKOMS tanba bele organiza diálogu hafoin hosi parte petisionáriu submete petisaun ba Prezidente Parlamentu Nasionál, Tribunál Rekursu, MAPKOMS inklui Sekretaria Estadu Komunikasaun Sosiál (SEKOMS).

.
Inisiadór Petisaun no Reprezentante Petisiáriu, Noemio Falcão Imajen Tatoli/António Gonçalves

“Ha’u konklui katak iha buat tolu maka ami tenke konkorda hamutuk petisionáriu sira no Konsellu Imprensa hodi haree buat ne’ebé maka ami rasik konkorda naksalak hela,” nia dehan.

Ba daruak, parte petisionáriu sira sei halo fali karta ne’ebé tuir konkordánsia hamutuk hodi haruka ba MAPKOMS.

“Ami sei tur hamutuk ko’alia ho Konsellu Imprensa katak sei iha tempu, organiza fali prosesu eleisaun ba reprezentante jornlista tur iha Konsellu Imprensa. Jornalista sira maka hili, nune’e ita bele komprementa fali artigu 17 Lei Komunikasaun Sosiál ne’ebé define loloos katak jornalista maka iha direitu atu vota hodi hili reprezentante jornalista ba Konsellu Imprensa ninia mandatu ba daruak,” nia subliña.

Pozisaun petisionáriu ba datoluk maka kuandu opsaun rua ne’e la konsege maka petisionáriu sira sira sei kontinua prosesu legál.

“Tanba ami lakohi a-favór ba buat naksalak, maka tenke lori prosesu ba oin. Karik asuntu tolu maka la konsege realiza, opsaun ikus sei kontinua prosesu legál,” Falcão realsa.

Sorin seluk, Konselleru CI, Hugo Fernandes, konsidera petisaun ne’ebé aprezenta hosi petisionáriu sira ne’ebé kestiona prosesu eleisaun ba reprezentante AJTL iha CI, ne’ebé realiza iha loron 4 jullu 2020, ladun klaru.

Ministru Asuntu Parlamentár no Komunikasaun Sosiál, Francisco Jerónimo, halo mediasaun entre Reprezentante Petisionáriu, CI no AJTL, iha Salaun PKM, Palásiu Governu, segunda (20/07). Imajen Tatoli/António Gonçalves

“Iha karta petisaun ko’alia intensaun seluk maibé iha diálogu ko’alia fali buat seluk,” nia haktuir.

Tuir Konselleru ne’e, kona-ba petisaun ne’ebé husu CI anula rezultadu eleisaun AJTL hodi hili Virgílio Guterres iha CI, hanesan diskriminasaun bainhira jornalista balun vota balun lae.

“Ha’u hanoin ida-ne’e presiza haree didi’ak kuandu jornalista no editór ida maka serbisu no halo knaar iha tempu barak, maibé tanba de’it laiha karteira profisionál, nia laiha direitu ba vota. Ha’u hanoin presiza ita haree kestaun ne’e tanba hanesan diskriminasaun umanidade ne’ebé forte tanba jornalista balun vota no balun lae, ne’e diskriminasaun boot,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here