Membru Movimentu Tasi Moos hamoos no hili lixu sira iha área tasi ninin Bidau Lecidere, sábadu ne’e. Imajen MTM

DILI, 18 jullu 2020 (TATOLI)–Movimentu Tasi Moos (MTM), ohin, hamutuk ho Embaixada Nova zelandia ho Pixelasia organiza atovidade halibur foer iha tasi-ibun Lecidere-Dili. Asaun ida-ne’e hanesan atividade voluntáriu ida atu promove no sensibiliza protesaun meiu ambiente iha Timor-Leste  no mundu.

Koordenadór Movimentu Tasi Moos (MTM), Resibere Mota, hateten atividade ne’e realiza tanba hetan suporta hosi Embaixada Nova Zelandia tanba ne’e Movimentu Tasi Moos apresia no agradese, tanba ohin loron joven Timor hakarak kontra foer.

“Mai ita hamutuk hodi luta kontra lixu iha Timor-Leste liuliu iha tasi área Dili nian. Tanba ita hotu hatene katak impaktu tasi la moos sei la fó saudavél ba ita-nia animál moris iha tasi-laran,” dehan Koordenadór Movimentu Tasi Moos, Rsibere Mota, ba jornalista sira iha Lecidere, Dili, sábadu ne’e.

Aleinde suporta hosi Nova Zelandia, nia dehan, grupu Movimentu Tasi Moos ne’e hetan mós apoiu hosi COICA no Uniaun Europeia (UE).

MTM halibur lixu iha Lecidere. Imajen/Media MTM.

Nia hateten, Movimentu Tasi Moos eziste tinan lima ona ho volutariamente hodi kontinua hala’o atividade hamoos tasi iha territóriu Nasionál no hanoin hala’o mós iha munisípiu sira seluk hanesan iha Munisípiu Bobonaro, Same no Liquiça.

“Ba asuntu ne’e, ami fó ona formasaun ba ita-nia estudante sira inklui Forsa-Defeza Timor Leste (F-FDTL) kona-ba lixu no oinsá prezerva lixu no proteze rikusoin naturál iha tasi laran,” nia dehan.

Iha parte seluk, Konsellu Suku Bidau Santa-Ana, Francisco dos Santos Reis Ximenes, hateten atividade hamoos tasi ne’ebé realiza hosi grupu MTM ne’e importante hodi hamoos maibé presiza ema hotu nia kolaborasaun no kontribuisaun hodi kuidadu tasi hosi foer.

“Atividade hamoos tasi ne’e importante tanba oinsá atu fanun ita joven Timor hodi labele soe lixu arbiru iha tasi ninin. Maibé soe lixu iha nia fatin, nune’e ita haree tasi ne’e moos, furak no bonita,” nia dehan.

Tanba ne’e, nia husu ba família no vizitante sira ne’ebé hakarak vizita iha semana nia rohan karik, husu atu soe lixu iha nia fatin ne’ebé mak Governu prepara ona.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here