Traballadór sira halo konstrusaun estrada iha Maubara. Imajen Tatoli/António Gonçalves

DILI, 18 jullu 2020 (TATOLI) Ministériu Obra Públika (MOP) liuhosi Diresaun Nasionál Aprovisionamentu (DNA) sei hapara kontratu kompañia sira ne’ebé servisu retensaun expira ona hodi orsamenta ba projetu foun sira.

Tuir Diretór Nasionál Aprovizionamentu MOP, Quintiliano Afonso Belo, dezisaun ne’e bazeia orientasaun hosi Ministru Obra Públiku, Salvador Eugênio Soares dos Reis Pires ba ajénsia obra-nain sira no DNA, atu hapara kontratu sira ne’ebé to’o agora ninia servisu retensaun expira ona no MOP kontinua orsamenta maibé empreza sira la halo kontesta ba ministériu.

“Bainhira la hapara, MOP kada tinan re-orsamenta nafatin osan hirak ne’e no sei halo todan pakote orsamentu MOP nian. Signifika tinan-tinan ita labele promove projetu foun tanba orsamentu ba projetu tuan sira sei barak hela ho lian seluk karik Estadu sei la fó osan foun ba MOP atu gasta kuandu osan tuan ka tusan barak hela. Alende ne’e fó mos impaktu ba ami-nia prestasaun iha ezekusaun orsamentu,” tenik Diretór Nasionál ne’e ba Agência Tatoli iha ninia knaar fatin, Caicoli, sesta (17/07).

Dirijente ne’e informa, daudaun ne’e kuaze kompañia hamutuk 40-resin mak nia orsamentu retensaun ne’e ko’a ka rai hela iha kada pagamentu ho porsentu 10.

“Rai orsamentu retensaun nia objetivu maka fó garantia ba Governu hodi asegura no retein kualidade bainhira hetan defeitu ruma ne’ebé presiza halo retensaun,” nia akresenta.

Nia subliña, idealmente kompañia sira sempre kumpre sira devér tuir kontratu, maski balun la kumpre.

“Maibé iha kompañia balun nakar oituan tanba finaliza ona projetu ho porsentu 100 no hetan ona pagamentu sira lakoi halo ona retensaun no sira hatene hela katak defeitu ne’ebé mosu iha terrenu la hanesan ho montante orsamentu retensaun ne’ebé iha entaun sira abandona ona,” nia haktuir.

Parte seluk tékniku sira mós hatene momoos katak kompañia sira ne’ebé la halo pedidu ba osan retensaun ne’ebé sira rai hela, signifika katak sira la halo servisu retensaun.

“MOP mós labele ezekuta tanba prejudika tebes ezekusaun orsamentu MOP nian no kontinua re-orsamenta nafatin durante laiha terminasaun kontratu,” nia realsa.

Ho razaun ne’e maka MOP fó orientasaun klaru katak hala’o avaliasaun ba kompañia sirania dezempeñu servisu ho profundu hodi halo terminasaun kontratu ne’ebé sira ka’er, nune’e labele halo todan orsamentu ho retensaun ne’ebé rai durante tinan barak.

Diretór ne’ebé prodúz kontratu ba obra Estadu sira ne’e promete sei ezekuta orientasaun hosi ezekutivu ho baze ba relatóriu avaliasaun hosi ajénsia sira (project owner) no hapara kontratu servisu retensaun nian.

“Hodi nune’e ami (MOP) bele promove fali projetu foun iha tinan sira tuirmai ba povu nia moris di’ak,” nia garante.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here