Embaixadór Nova Zelandia iha Timor-Leste, Philip Hewitt. Imajen/Egas Cristovão

DILI, 18 jullu 2020 (TATOLI) – Governu Nova Zelándia iha Timor–Leste liuhosi embaixadór, Philip Hewitt, hatete ninia parte apoiu atividade kampaña audiovisuál Rubbish Monster ho objetivu eduka ema soe foer iha nia-fatin.

Nia dehan, hamoos no foti lixu ne’e la’ós responsabilidade Governu ka autoridade munisipál nian, maibé ema ida-idak nian responsabilidade hodi hamoos no foti lixu, nune’e ambiente kontinua saudavél.

Lixu Nia Impaktu Ba Ambiente No Umanidade

“Ami hosi embaixada Nova Zelándia pronto atu suporta parte relevante sira iha Timor-Leste atu oinsá luta kontra Rubbish Monster. Ohin loron ita halibur hamutuk no manan duni kontra Rubbish Monster”, dehan Philip Hewitt ba jornalista sira hafoin hala’o atividade hamoos lixu iha área Bidau Lecidere, sábadu ne’e.

Embaixada Nova Zelándia apoiu orsamentu ho montante $19.500, ba atividade kampaña Rubbish Monster tinan ida nian ba Organizasaun Naun Govermentál lokál ho naran Cinema Lorosa’e.

Membru Movimentu Tasi Moos hamoos no hili lixu sira iha área tasi ninin Bidau Lecidere, sábadu ne’e. Imajen MTM

Hamoos tasi ibun, nu’udar kampaña Rubbish Monster ne’ebé hetan apoiu másimu ho voluntariamente husi Movimentu Tasi Moos.

Embaixadór enkoraja ema hotu atu haree ka asesu ba pájina facebook MTM ho Embaixada nian atu oinsá luta kontra lixu.

Kampaña ho naran Rubbish (lixu) Monster sei halo hosi Cinema Lorosa’e no Pixelasia ne’ebé hetan tulun osan hosi Embaixada Nova Zelándia ba atividade Produsaun Audiovisual no Screening iha Timor-Leste tomak.

Atividade sira ba tinan ida sei gasta osan hamutuk $19.500 ne’ebé kobre parte husi produsaun, broadcasting iha RTTL, EP, GMNTV no TVE  no mós sosialisazaun ho komunidade. Inklui hatudu filme ho Cinema Lorosa’e iha Timor-Leste laran tomak.

Depois lansamentu kampaña iha outubru 2019 liubá, munisípiu tolu mak kompleta ona iha 2019 no Cinema Lorosa’e sei hahú fali viajen ba munisipiu sira seluk iha fulan agostu tinan ne’e.

Jornalista : Osoria marques

Editór      : Cancio Ximenes

HAKEREK NO HATÁN

Please enter your comment!
Please enter your name here