Diretór Nasionál Aprovizionamentu MOP, Quintiliano Afonso Belo. Imajen/Florêncio Miranda Ximenes

DILI, 18 jullu 2020 (TATOLI) Tuir planu iha tinan ne’e nia-laran, Ministériu Obra Públika (MOP) esforsu maka’as ho empreza sira atu finaliza estudu viabilidade no dezeñu detalladu sira hodi bele hatama planu ba Orsamentu Jerál Estadu (OJE) 2021 hodi bele ezekuta obra ne’e.

Ministru Obra Públika, Salvador Eugênio Soares dos Reis Pires orienta ona konsultór sira hodi bele aselera no finaliza estudu no dezeñu detalladu sira hodi bele implementa obra hirak ne’e iha tinan-2021.

“Ita-nia Ministru husu atu empreza konsultór sira tenke serbisu ho serenidade, on time no mantein kualidade. Tenki halo ezersísiu hodi kolabora no koordena másimu ho tékniku sira hosi MOP no Ajénsia Dezenvolvimentu Nasionál (ADN) inklui Ministériu Planu Ordenamentu (MPO) nian, nune’e ikus mai bele lori duni rezultadu di’ak no ein termu kualidade implementasaun fíziku bele diferente kompara ho obra hirak ne’ebé laiha estudu,” tenik Diretór Nasionál Aprovizionamentu MOP, Quintiliano Afonso Belo ba Agência Tatoli, iha ninia knaar fatin, Caicoli, sesta ne’e.

Tuir Dirijente ne’e, estudu tenke konklui iha tinan ida ne’e, tanba ne’e konsultór sira komprometidu atubele prodúz rezultadu estudu durante fulan-haat to’o lima tuir proposta no kontratu ne’ebé sira asina.

“Tanba ne’e ha’u laiha dúvida katak sira labele halo hotu obra hirak ne’e antes tinan ne’e nia rohan,” nia akresenta.

Daudaun ne’e, MOP esforsu hodi finaliza Estudu ba dezeñu detalladu estrada, ponte, Sidade Universitáriu Aileu, Hospital Nacional Guido Valadares (HNGV), Ospitál Lahane no Reviltalizasaun Komunidade Aitarak-Laran, inklui planu mestre ba bee-moos no sanitasaun iha kapitál munisípiu neen molok dezembru 2020.

MOP mós selebra ona kontratu ho empraza konsultór sira iha inísiu 2020, maibé tanba Timor-Leste nu’udar nasaun afetadu husi surtu COVID-19 ne’ebé fó impaktu ba empreza sira atu serbisu iha terrenu, maka empreza balun tenke rekruta konsultór internasionál tuir rekezitu ne’ebé hakerek iha termu referénsia.

“Ministru Salvador halo esforsu hodi defende orsamenta millaun $10 hodi halo estudu viabilidade ba estrada nasionál hamutuk pakote 12 no ponte unidade 10 ne’ebé daudaun la’o iha terrenu no tama ona iha faze koordensaun téknika hodi prodúz inceptions report atu avansa ba faze tuirmai,” nia subliña.

Iha tinan 2019, MOP liuhosi Diresaun Nasionál Aprovizionamentu (DNA) konsege halo konkursu públiku estudu planu mestre ba fornesimentu bee-moos no sanitasaun iha munisípiu neen hanesan iha kapitál Ainaro, Covalima, Bobonaro, Aileu, Emera no Liquiçá.

Nune’e mós, ba estudu no dezeñu detalladu ba Sidade Universitáriu Aileu, estudu no planu mestre ba HNGV, Ospitál Lahane no Reviltalizasaun Komunidade Aitarak-Laran.

“Konsultór ba planu prontu ona no hein de’it orden traballu husi ajénsia sira maka sira ezekuta ona obra no finaliza antes tinan-2020 ne’e nia rohan,” nia realsa.

Pakote Estudu Viabilidade no Dezeñu Detalladu ba Estrada no Ponte

Estudu viabilidade no dezeñu enjeñeiru detalladu ba estrada Manatuto to’o Laclo, estrada Laga to’o Baguia, estrada urbana Maliana, estrada Luca to’o Lacluta.

Nune’e mós, estudu viabilidade no dezeñu enjeñeiru detalladu ba estrada munisipál hanesan, Bobonaro Jct. to’o Lolotoe, estrada municipál Aileu Jct.(Seloi) to’o Gleno Jct, estrada Turiskai to’o Alas, estrada Uatulari to’oLaisorolai, estrada Manatuto Jct. to’oSoibada, estrada Uaiaca to’o Quelicai – Ossu, estrada Aileu to’o Lequidoe no estrada Aileu Jct.(Seloi) to’o Gleno Jct.

Estudu viabilidade no dezeñu enjeñeiru detalladu ba ponte hamutuk pakote rua ho kada pakote iha unidade lima hanesan, estudu viabilidade no dezeñu enjeñeiru detalladu ba ponte Samalari (Laga to’o Baguia), Sana (Uatulari to’o Laisorolai), Sumako (Lacluta Uma Tolu), Maloa 5 (Matadouro to’o RTK), Comoro Mota Ulun (Dili to’o Aileu).

Estudu viabilidade no sezeñu enjeñeiru detalladu ba ponte Suku Liurai (Aileu to’o Lequidoe), Maubara 1 (Liquiçá), Bera Rai-Laco (Railaco Kraik to’o Railaco Leten), Sanfuk (Suai), Sanfuk (Same to’o Fahi Nehan).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here