Segundu Komandante Polísia Munisípiu Dili, Superintendente, Euclides Belo. Imajen Tatoli/Eugénio Pereira

DILI, 17 jullu 2020 (TATOLI)- Komandu Polísia Munisípiu Dili kontinua halo investigasaun profunda ba suspeitu na’in-ida ne’ebé deskonfia envolve iha kazu konfrontasaun ho grupu juventude hodi baku rahun estátua Na’in Feto Maria no baku rahun komunidade nia uma tolu iha área Fatu-ahi, Suku Camea, Postu Administrativu Cristo Rei, Dili, iha sábadu no domingu (11-12/07).

Notísia Relevante : Konfrontu Fatu-ahi, Uma Tolu Rahun no Polísia Kaptura Joven Na’in-Neen

Segundu Komandante Polísia Munisípiu Dili, Superintendente Asistente Xefe Euclides Belo deklara, konfrontu baku no tuda malu entre grupu juventude iha área Fatu-ahi, Suku Camea, PNTL konsege kaptura suspeitu na’in-neen (6) no na’in-lima (5) husik livre no na’in-ida sei kontinua halo aprezentasaun periódiku ba PNTL.

“Kazu ne’ebé akontese  semana kotuk, ita detein ema na’in neen, depois na’in-lima hetan ona liberdade no na’in-ida maka hetan medida aprezentasaun periódika tanba nia sei kesi metin ho prosesu investigasaun profunda  ne’ebé ligadu ho kazu baku rahun estatuta Na’in Feto,” hateten  Euclides Belo, ohin, ba jornalista sira iha nia servisu fatin.

Nia hatutan, PNTL mós rekolla ona evidénsia balun hosi vítima sira ne’ebé nia uma hetan estragus atu ajuda prosesu investigasaun ba autór ne’ebé deskonfia baku rahun estátua Na’in Feto.

Iha akontesimentu espontánea ne’e, rezulta mós joven balun sofre kanek kaman tanba hetan baku hosi grupu sira ne’ebé halo ataka ba malu.

Kazu konfrontasaun ne’e akontese, tanba iha juventude ida hala’o hela ninia atividade atu ba hili ai-maran iha foho leten, nune’e joven ne’e tenta la’o iha grupu juventude balun ne’ebé halo hela atividade treinu arte marsiál nian maka baku uluk joven ne’e, ikus mai grupu joven balun la simu hodi halo ataka ba malu.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here