Segundu Komandante Polisia Munisípiu Dili, Superintendente Asistente Xefe Euclides Belo. Imajen/Eugénio Pereira

DILI, 17 jullu 2020 (TATOLI) – Komandu Polísia Nasionál Timor-Leste (PNTL) Munisípiu Dili simu orden hosi Komandu Jerál PNTL, ohin, hodi asegura seguransa ba atividade Grupu Rezisténsia Nasionál Defende Justisa Konstituisaun (RNDJK) hodi bele mantein nafatin paz no trankulidade.

Notísia Relevante : RNDJK Mobiliza Masa Atu Entrega Petisaun Ba PR Lú Olo

Segundu Komandante Polísia Munisípiu Dili, Superintendente Asistente Xefe Euclides Belo dehan, Komandu Dili rasik mós prepara ona rekursu hodi koopera ho Servisu Informasaun Polísia (SIP), Unidade Polísia Marítima (UPM) atu asegura atividade RNDJK nian la’o iha armonia no paz.

“Atividade ne’ebé Portavós RNDJK, Angela Freitas no António Aitahan Matak halo ohin ne’e ami hetan despaxu hosi Komandu Jerál liuhosi Komandu Operasaun Jerál hodi garante seguransa para sira bele realiza sira nia atividade tuir pedidu ne’ebé hato’o ba Komandu PNTL,” informa  Euclides Belo, ohin, ba jornalista sira.

Nia dehan, mezmu ohin grupu RNDJK halo de’it konsentrasaun masa hodi realiza atividade konferénsia imprensa iha sede Bairru Grillos, Dili, maibé PNTL Dili hetan apoiu seguransa iha área Palaçio do Governo nian oin too fatin konsentrasaun masa.

“Ita prepara rekursu tuir númeru masa ne’ebé maka iha,” hateten Euclides Belo hodi hatutan tan,  RNDJK koopera di’ak tebes ho PNTL no husu ba povu lalika pániku tanba situasaun la’o di’ak.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here