Vise-Xefe Bankada KHUNTO, Deputada Olinda Guterres. Imajen/Egas Cristovão

DILI, 17 jullu 2020 (TATOLI)—Xefe Bankada KHUNTO, Deputada Olinda Guterres, hateten Konselleiru Másimu Partidu Kmanek Haburas Unidade Nasionál Timor Oan (KHUNTO), José dos Santos “Naimori” Bucar, fó ona orientasaun ba deputadu sira hosi partidu KHUNTO atu labele ko’alia tán hasoru igreja liuliu padre sira.

“Ami labele ko’alia ona hasoru igereja ne’e. Ami respeita konselleiru ne’ebé hatún mai ami dehan katak ami na’in-lima mai tuur iha-ne’e labele ko’alia kona-ba ita-nia igereja, liuliu ba padre sira labele ko’alia tán,” Xefe Bankada KHUNTO, Deputada Olinda Guterres, informa ba jornalista sira, iha resintu Parlamentu Nasionál, sesta ne’e.

Nia dehan, bankada KHUNTO sei la ko’alia tán bainhira sé de’it mak hakarak levanta beibeik asuntu ne’e iha plenária.

“Ami foti mak povu nia aspirasaun,” dehan Xefe Bankada KHUNTO, Deputada Olinda Guterres.

Deputada no deputadu KHUNTO iha Parlamentu Nasionál mak hanesan Olinda Guterres, Luis Roberto, António Verdiál de Sousa, António Nobre Tilman no Deputada Irene Gonzaga Sarmento.

Xefe Bankada KHUNTO ko’alia asuntu ne’e hafoin Konselleiru Másimu Partidu Kmanek Haburas Unidade Nasionál Timor Oan (KHUNTO), José dos Santos Naimori Bucar liuhosi konferénsia imprensa, horisehik, husu deputadu na’in-lima hosi bankada refere atu foka asuntu seluk, labele ko’alia hasoru tán padre sira.

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here