DILI, 17 jullu 2020 (TATOLI)–-Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, preokupa ba esbosu-lei Kriminaliza Difamasaun tanba lei ne’e sei taka dalan fali ba implementasaun ba Medida Prevensaun no Kombate Korrupsaun.
“Ha’u preokupa maka esbosu-Lei Kriminaliza Defamasaun tanba ida-ne’e mai atu taka dalan fali ba implementasaun ida ba Lei Medida Prevensaun no Kombate Korupsaun. Hanesan ha’u dehan Lei difamasaun mai nakfilak ita sira krítika ne’e sai fali kriminozu. Tanba agora tama tan difamasaun ne’e, ha’u hanoin laiha razaun ita atu hamriik hasoru korrupsaun tanba lei difamsaun taka dalan ba Lei Medida Prevensaun no Kombate Korrupsaun,” dehan João Boavida ba Ajénsia TATOLI hafoin ramata programa Editor Club ne’ebé AJTL no CI realiza iha Salaun Konsellu Imprensa, Kintál Boot, Dili, kinta ne’e.
Nia konsidera, Lei Kriminaliza Difamasaun ne’e loke dalan ba ukun-nian sira atu abuza podér nafatin, tanba sira iha ona buat ida maka imunidade polítika.
Tanba, nia dehan, agora ne’e sira barak maka subar-aan iha imunidade políkita nia-laran, hodi nune’e bale evita impunidade ne’ebé sira iha la’os de’it maka imunidade maibé impunidade mós.
Aleinde ne’e, nia dehan, Lei Antí Corupsaun (LAC, sigla portugés) altera ba Lei Medida Prevensaun Kombate Korupsaun (MPCC, sigla portugés) mudansa iha linguajen maibé ninia objetivu ne’e ida-de’it tanba eatabelse atu kombate korrupsaun iha Timor-Leste.
“Ha’u hanoin laiha diferensa atu Lei Anti Korupsaun ka Lei Medida Prevensaun no Kombate Korrupsaun. Ida-ne’e, mudansa iha linguajen de’it maibé ninia objetivu ne’e ida-de’it katak hamriik hasoru korrupsaun iha Timor-Leste. Ne’ebé, bainhira Komisaun A aprova lei ne’e, ha’u hanoin di’ak ba ita hotu no liuliu ba sira-ne’ebé responsável involvidu iha programa atu prevene kombate korupsaun. Tanba, iha ona baze legál ida atu bele hala’o atividade,” João Boavida hateten.
Diretór ne’e dehan, iha Lei Antí Korrupsaun transforma fali ba Medida Prevensaun no Kombate Korupsaun ne’e tuir informasaun ne’ebé nia rona katak ofisiál hotu-hotu iha nivél Governu nian tenke deklara sira-nia rikusoin.
Nia hateten, lei Medida Prevensaun no Kombate Korupsaun ne’e atu hakat liu kedan to’o iha pontu ida dehan katak públiku mós sei iha informasaun ba deklarasaun ukun-nain sira nian kona-ba sira-nia riku-soin.
Lei Antí Korrupsaun ka Medida Prevensaun no Kombate Korupsaun ne’e, nia konsidera, furak no animadu ne’ebé atu bele kontinua esforsu ne’ebé to’o ohin loron sira halo Lei ne’e atu ema hotu-hotu bele la’o tuir.
Jornalista : Osória Marques
Editór : Cancio Ximenes
