DILI, 16 jullu 2020 (TATOLI) – Governu Korea Súl apoiu máskara hamutuk rihun 200 mai Timor-Leste hodi ajuda Governu ba prevene no kombate pandemia globál surtu COVID-19.
Máskara hirak ne’e to’o iha Aeroportu Comoro Dili iha kinta ne’e purvolta tuku 06:00 Otl, tula ho aviaun Motar Korea HO Marka R.O.K Air Force ROKAF ⁵⁵036.
Notísia Relevante :KOICA-KIDC Oferese Ekipamentu Prevensaun COVID-19 ba EBS Faról
Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten objetivu husi apoiu ne’e atu tulun profisionál saúde sira hodi halo servisu liliu ba prevensaun no metigasaun moras coronavirus iha rai-laran.
“Máskara ne’ebé ajuda hosi Korea atu bele tulun ita nia pesoal saúde sira bele utiliza hodi bele halo servisu loroloron tanba luta ba Covid-19 ne’e seidauk remata. Ita kontinua luta nafatin,” katak Governante ne’e iha Aeroportu Comoro, kinta ne’e.
Notísia Relevante :KOICA-KIDC Apoiu Fasilidade Prevensaun COVID-19 ba EBF Tasi-Tolu
Ekipamentu ne’e rai hotu iha armazén SAMES Kampung-Alor Dili hodi kontinua distribui ba Ospitál Nasionál, Referál, Sentru Saúde no Postu Saúde sira.
Iha fatin hanesan Embaixadór Korea Súl iha Timor-Leste, Lee Chen-Bum, hateten kooperasaun entrea nasaun rua la’ós foin agora maibé desde uluk kedas, tanba ne’e Korea nafatin kompromitidu apoiu Timor-Leste iha área saida de’it.
“Korea ho Timor-Leste nia kooperasaun uluk kedan to’o ohin loron nafatin metin ba oin. Máskara rihun 200 ne’ebé ami fó hodi tulun maluk Timoroan sira hodi prevene Covid-19,” dehan Lee Chen-Bum.
Jornalista : Hortencio Sanchez
Editór : Agapito dos Santos
