IGE hahú aterru estrada Suku Muapitine, Postu Administrativu Lospalos, Munisípiu Lautém. Imajen/Lívio Mendes

DILI, 17 jullu 2020 (TATOLI)Komunidade iha Suku Muapitene, Postu Administrativu Lospalos, Munisípiu Lautém agradese ba Ministériu Obra Públika (MOP) liuhosi Institutu Jestaun Ekipamentu (IGE, sigla Portugés), tanba hahú reabilita estrada a’at husi trosu kapitál Lospalos ba Aldeia Malahara kauze kilómetru 23.

“Ha’u lori ha’u nia naran rasik no komunidade Suku Muapitine agradese ba Governu liuliu Ministériu Obra Públika no IGE tanba bele rona ona povu nia proukupasaun durante tinan barak nia-laran, tanba povu hein mak ida ne’e duni hodi hadi’a kondisaun estrada,” tenik Xefe Suku Muapitine, Lívio Mendes via telefónika ba Agência Tatoli, sesta ne’e.

Autoridade Lokál ne’e informa IGE reabilita estrada iha área ne’e hafoin iha fulan-marsu hala’o peskiza ba kondisaun estrada iha Suku Muapitene atubele aterru ho rai-mutin, nune’e bele fasilita abitante sira asesu ba merkadoria no sentru saúde.

“IGE hahú horisehik, suru sai estrada sira ne’ebé kuak husi Aldeia Malahara no sei to’o iha kapitál Munisípiu Lospalos, sira serbisu durante semana tolu,” nia subliña.

Ho nue’e, Livío Mendes espera liuhosi aterru rai-mutin ne’e bele fasilita ona komunidade sira atu bele asesu ba merkadoria no sentru saúde atu bele responde nesesidade uma-laran.

“Ami la haluha agradese ba Agência Tatoli tanba dala barak halo publikasaun ba ami-nia preokupasaun no hetan duni resposta husi ezekutivu sira,” Xefe Suku agradese.

Nia espera Governu kontinua aterru estrada iha suku ne’e ba futuru no bele iha tan forsa finasiamentu hodi bele uza alkatraun atu fasilita di’ak liután vizitante sira ba fatin istóriku hanesan lagoa Ira-Lalaro no Foho Paicau.

Suku Muapitine tama iha área protejida Parke Nasionál Nino Konis Santana ne’ebé potensiál ba setór agrikultura, pekuária no turizmu komunitáriu no koñesidu ho fatin istóriku tanba besik liu foho Paicau ne’ebé líder rezisténsia luta libertasaun nasionál barak subar iha área ne’e.

Suku Muapitine kompostu hosi aldeia lima ho totál populasaun 2.391 hosi uma-kain 486.

Aldeia Malahara ho totál populasaun hamutuk 558, kompostu hosi mane 269, feto 319 ho uma-kain 112, aldeia Vailoro ho populasaun na’in-499,  kompostu hosi mane 253 no feto 246 ho uma-kain 101, Aldeia Muapitine ho populasaun 443 kompostu hosi mane 200, feto 243 ho uma-kain 96.

Aldeia Lopuloho iha uma-kain 67 ho totál populasaun 351, kompostu hosi mane 165 no feto 186 no Aldeia Pehefito ho populasaun 540, kompostu hosi mane 279, feto 261 họ uma-kain 110.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here