Deputadu Patrocínio dos Reis Fernandes. Imajen/Espesial.

DILI, 17 jullu 2020 (TATOLI)—Membru Komisaun A (Justisa no Konstitusionál), Deputadu Patrocínio Fernandes dos Reis, hateten Xefe Departamentu to’o Prezidente Repúblika deklara rikusoin ba públiku ne’e risku ba deklante sira-nia vida.

Nia esplika, deklara rikusoin ne’e prevee iha deklarasaun bens katak kualkér sidadaun ne’ebé asume funsaun ka kargu públiku tenke deklara nia bens ne’ebé nia iha ba autoridade kompetente hanesan Tribunál no Comissão Antí Corrupção (CAC). 

Iha ezosu-lei Medida Prevensaun no Kombate Korrupsaun (MPCC-sigla portugés) ne’e, nia dehan, define autoridade kompetente hanesan Tribunál no CAC mak monitoriza deklarante sira-nia rikusoin.

“Tanbasá mak labele asesu ba públiku. Ita boot sira hatene katak ita-nia nasaun ohin-loron iha mundu globalizasaun, ne’ebé iha tentativa no esforsu hotu-hotu hosi ema bele uza meiu komunikasaun liuhosi internet ameasa ema seluk nia seguransa. Tanba ne’e mak artigu ne’e hodi haree katak fó ba autoridade kompetente maka monitoriza, akompaña katak ema ne’e nia rikusoin ne’e hira. Antes sai diretór ninia rikusoin hira. Depois nia diretór ba tinan rua ka tolu ninia rikusoin ne’e sa’e ba hira. Iha balansu ho ninia rendimentu ka lae,” Membru Komisaun A ne’e informa ba jornalista sira, iha resintu Parlamentu Nasionál, sesta ne’e.

“Se (deklarante nia rikusoin) liuhosi ida-ne’e nia hetan hosi ne’ebé. Maibé, la’ós kualkér ema ida tenke asesu ka kualkér ema ida hosi estranjeiru para bele hatene ema ne’e ninia rikusoin, nia uma iha fatin ida-ne’e no ida-ne’ebá. Ne’e fó ameasa no risku ba ema (deklarante) nia vida,” nia dehan. 

Tanba ne’e, nia hateten, Komisaun A ne’ebé trata asuntu Justisa no Konstitusionál deside di’ak liu deklarante sira-nia deklarasaun bens (rikusoin) deklara liuhosi Tribunál no CAC.

Nia aegumenta, labele deklara ba públiku tanba haree ba ema-nia direitu seguransa, tanba ne’e mak halo lei ne’e tenke tetu ba buat hotu-hotu.

“Tanba ema bele ameasa deklarante liuhosi internet, terrorizmu, haree mós ba instituisaun estadu sira foin mak hamrrik presiza kondisaun tanba ne’e mak ita halo lei ne’e tenke tetu ba buat sira-ne’e hotu,” nia hateten. 

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here