Komunidade ho atensaun rona esplikasaun hosi ekipa tékniku konaba importansia prezerva biodiversidade. Imajen mídia CITL

DILI, 17 jullu 2020 (TATOLI) – Conservation International Timor-Leste (CITL) hamutuk ho liña ministeriál sosializa area protejida monte Legumau ba komunidade postu administrativu Iliomar, munisípiu Lautein no postu administrativu Baguia, munisípiu Baukau.

Atividade ne’ebé hala’o iha semana kotuk ho objetivu fó hanoin ba komunidade ne’ebé hela besik área protejida hodi konserva espésie sira ne’ebé ameasadu inklui ai-horis no animál fuik sira.

Tuir nota komunikadu ne’ebé TATOLI simu hosi mídia CITL haktuir sosializasaun ne’e foku ba planu no jestaun konservasaun biodiversidade iha área protejida nasionál ba suku haat ne’ebé besik Monte Legumau hanesan suku Cainleu (Ilomar, Lospalos), Larisula, Defawasi, no Uakala (Baguia, Baukau).

Atividade ne’e loke husi Administradór postu Administrativu Ilomar, João Baptista Ruas no iha postu administrativu Baguia, loke husi Administradór Postu Baguia, António dos Santos.

Autoridade lokál nain rua ne’e iha sira ninia diskursu hateten suporta programa husi governu no ajénsia sira, inklui hasa’e konsiénsia komunidade konabá importánsia husi konservasaun no re-abilitasaun ba sustentabilidade área protejida nasionál no benefísiu ba komunidade lokál mak hela iha área refere.

Oradór importante ba atividade ne’e mak Diretór Nasionál Konservasaun Natureza, Ministériu Agrikultura no Peskas, João Antalmo, ne’ebé introdús no esplika ordenamentu no sistema jestaun área protejida nasionál.

Diretór Nasionál Informasaun Geospatiál liuhusi Diresaun Jerál Terras no Propriedade, Ministériu Justica, Romão Guterres, esplika prosedimentu legál no atividade proibidu konabá lei Terras no Propriedade liga ho demarkasaun pontu ba área utilizasaun, área protejida, no direitu privasidade ba rai no riku-soin sidadaun nian.

Xefe Departamentu Área Protejida, Pedro Pinto, halo esplikasaun konabá tipu espésie sira mak hahú mohu daudaun bazeia ba estudu no evidénsia sira. Enkuantu, João dos Santos hanesan tékniku husi Departamentu Área Protejida esplika pontuasaun mapa no prosesu halo demarkasaun ba área protejida ba komunidade.

Xefe Suco husi Cainleu, Larisula, Defawasi no Uakala, estensionista suku hamutuk ho konsellu suku entuziazmu maka’as hodi suporta atividade konservasaun biodiversidade iha sira nia suku.

Hafoin remata atividade ne’e, ekipa sei organiza fila fali programa hanesan konabá pontu koordenasaun no halo demarkasaun ba Monte Legumau iha fulan-setembru ka outubru tinan ne’e.

Inisiativa ne’e organiza husi ekipa tékniku liuhusi Diresaun Nasionál Área Konservasaun Natureza, Diresaun Nasionál Informasaun Geospatiál, CITL, governu munisípál, lider komunitáriu, estensionista suku, no hetan apoiu finanseiru husi Global Environment Facility (GEF).

Ekipa ba atividade mai hosi Ministériu Agrikultura no Peskas liu husi Diresaun Nasionál Konservasaun Natureza, Departamentu Área Protejida iha Nasionál no Munisípiu, Ministériu Justisa liuhusi Diresaun Nasionál Informasaun Geoespesiál hamutuk ho governu munisípiu no CITL. (ki)

HAKEREK NO HATÁN

Please enter your comment!
Please enter your name here