Prezidente Repúblika, Francisco Guterres Lú Olo. Imajen António Gonçalves

DILI, 16 jullu 2020 (TATOLI)–Prezidente Repúblika (PR), Francisco Guterres “Lú Olo”, iha 15 jullu, promulga alterasaun dahuluk ba Dekretu-Lei kona-ba Medida Apoiu ba Empregu iha Ámbitu Pandemia COVID-19.

Konsellu Ministru aprova alterasaun dahuluk ba Dekretu-Lei númeru 16/2020, 30 abril,  kona-ba Medida Apoiu ba Empregu iha Ámbitu Pandemia COVID-19 ba artigu 14 no artigu 16.

Komunikadu hosi Prezidénsia Repúblika hateten, Governu halo alterasaun ba  artigu 14 hosi Dekretu-Lei refere kona-ba pagamentu relasionadu ho apoiu ne’ebé previstu iha artigu 8 no artigu 11,  katak sei hala’o hosi Institutu Nasionál de Seguransa Sosiál nu’udár operasaun tezouraria estraorsamentál no ba efeitu kontabilístiku no orsamentál, sei rejistadu nu’udár despeza hosi entidade ne’ebé mak responsável ba ninia finansiamentu.

Alterasaun halo mós ba artigu 16 hodi afirma katak, Dekretu-Lei ne’e sei aplika de’it ba kontratu traballu ne’ebé mak hetan suspensaun  ka kontratu traballu ne’ebé mak ninia períodu normál traballu hetan redusaun iha fulan fulan marsu, abril, maiu no juñu 2020, no aplika  mós ba kontribuisaun sira iha fulan hirak ne’ebé hanesan.

Iha ámbitu hatán ba pandemia COVID-19, Governu deside atu fó apoiu finanseiru ba sidadaun timoroan sira ne’ebé mak sira-nia empregu hetan efeitu husi moras COVID-19.

Konsellu Ministru aprova Dekretu-Lei kona-ba Medidas Apoiu Empregu iha Ámbitu COVID-19 tanba efeitu negativu ne’ebé mosu hosi moras COVID-19 ba merkadu traballu. Dekretu-Lei númeru 16/2020, 30 abril, loke dalan ba Estadu fó apoiu estraordináriu no temporáriu ba entidade empregadór no ba traballadór sira iha setór privadu.

Apoiu finanseiru ba empregu iha ámbitu COVID-19  tanba rendimentu traballadór sira-nian tun durante pandemia COVID-19 no entidade empregadór sira hasoru difikuldade finanseira ne’ebé fó efeitu ba  traballadór sira-nia rendimentu. Apoiu ne’e, nu’udar esforsu ne’ebé mak Governu halo atu asegura nafatin postu traballu ne’ebé mak ejiste durante pandemia COVID-19 iha Timor-Leste.

Liuhusi Dekretu-Lei ne’ebé refere, Governu sei halo pagamentu liuhusi Institutu Nasionál  Seguransa Sosiál atu selu traballadór timoroan ne’ebé inskritu ho subsídiu 60% hosi saláriu nu’udar medida apoiu empregu iha ámbitu pandemia COVID-19.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here