Primeiru-Ministru, Taur Matan Ruak. Imajen/Egas Cristovão

DILI, 16 jullu 2020 (TATOLI)- To’o oras ne’e governu seidauk iha figura foun atu troka Kay Rala Xanana Gusmão nu’udár reprezentante espesiál Governu Timor-Leste ba prosesu negosiasaun fronteira marritima no dezenvolvimentu projetu petroliferu iha tasi timor.

Primeiru Ministru (PM), Taur Matan Ruak, hato’o asuntu ne’e hafoin hala’o enkontru semanál ho Prezidente Repúblika (PR), Francisco Guterres “Lú Olo”, iha palásiu Prezidensiál Nicolau Lobato, Bairru Pité, Dili.

“Xanana rezigna aan tiha ona. Asuntu ne’e taka tiha ona no hotu ona. Kona-ba atu troka Xanana ne’e seidauk. Seidauk iha ema (figura),” Taur Matan Ruak hateten ba jornalista sira, kinta ne’e.

Hatan jornalista sira kona-ba prosesu atu dada kadoras mai Timor-Leste, Taur Matan Ruak hateten,presiza tempu naruk no ida-ne’e responsabilidade Governu nian.

Entretantu, líder Nasionál Kay Rala Xanana Gusmão rezigna aan hosi reprezentante espesiál Governu Timor Leste ba prosesu negosiasaun fronteira marritima no dezenvolvimentu projetu petroliferu iha tasi timor, liuhosi karta ne’ebé haruka ba Primeiru-Ministru, Taur Matan Ruak ,iha sesta semana kotuk.

Antes ne’e,  Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur, konsidera Kay Rala Xanana Gusmão iha direitu atu rezigna aan hosi kualkér kargu ne’ebé Xanana asume.

Maski nune’e, Lere hateten, ema hotu tenke respeita Kay Rala Xanana Gusmão nu’udár lider nasionál no ema hotu-hotu tenke rekoñese ninia esforsu, tantu ba luta libertasaun nasionál no ba dezevolvimentu nasionál.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here