Ministru Asuntu Parlamentár no Komunikasaun Sosiál, Francisco Martins da Costa Jerónimo. Imajen Tatoli/Egas Cristovão

DILI, 16 jullu 2020 (TATOLI) – Ministériu Asuntu Parlamentár no Komunikasaun Sosiál (MAPKOMS) fasilita ona diálogu entre estrutura Asosiasaun Jornalista Timor-Leste (AJTL), reprezentante petisionáriu, no Conselho de Imprensa (CI), relasiona ho petisaun ne’ebé asina hosi jornalista na’in-31 kona-ba prosesu eleisaun ba reprezentante CI.

Iha loron 09 jullu, Inisiadór Petisaun, Noemio Falcão hatama petisaun ne’ebé dirije ba Prezidente Parlamentu Nasionál, Aniceto Longuinhos Guterres Lopes tanba kestiona legalidade eleisaun ba membru AJTL hodi reprezenta asosiasaun ba CI, ne’ebé realiza hosi CI iha loron 4 jullu 2020, iha Salaun Delta Nova.

Ministru Asuntu Parlamentár no Komunikasaun Sosiál, Francisco Martins da Costa Jerónimo, hateten diálogu ohin ba dahuluk hodi buka solusaun.

“Ha’u hanesan Ministru ne’ebé tutela ba atividade komunikasaun sosiál, konvida sira hodi rona parte hotu nia hanoin halo nusa atu buka solusaun ba problema ne’ebé maka enfrenta daudaun ne’e,” tenik Ministru Jerónimo iha Palásiu Governu, kinta ne’e.

Notísia Relevante: Jornalista Na’in-31 Hatama Petisaun Ba PPN Tanba Kestiona Legalidade Prosesu Eleisaun

AJTL Husu PN Atu Anula Petisaun Jornalista 31

Governante ne’e dehan, nia parte apresia diálogu ne’e tanba parte tolu marka prezensa hodi bele rona husi parte hotu.

“Ha’u orgullu tanba sira hotu bele marka prezensa, inklui Konsellu Imprensa no mós jornalista seniór, nune’e bele ko’alia hanesan família husi fuan ba fuan to’o iha hanoin katak ami hakarak haree problema no foti desizaun hamutuk,” nia akresenta.

Ministru ne’e haktuir, iha diálogu ne’e parte petisionáriu no CI husu tempu hodi bele fó fali rezultadu kona-ba asuntu ne’e.

“Petisionáriu sira husu tempu ba sira tanba sira sei ko’alia hamutuk sira-nia maluk seluk ne’ebé asina mós petisaun no sei hasoru malu filafali. Nune’e mós Konsellu Imprensa husu tempu atubele Prezidente Konsellu Imprensa bele marka  mós prezensa iha enkontru tuirmai,” nia realsa.

Maski nune’e, Ministru Jerónimo husu ba parte sira hodi buka solusaun tamba enkontru ohin seidauk konsege hetan solusaun.

“Ohin ha’u fó hatene ba sira katak enkontru tuirmai tenke iha solusaun. agora ne’e hanesan halo aprosimasaun ba malu liuhosi diálogu hodi fó solusaun tanba hotu-hotu iha hanoin katak ita hakarak atu hadi’a área komunikasaun sosiál no parte hotu bele kumpre regra sira,” nia subliña.

Tuir nia, iha nesesidade atu haree filafali aplikasaun lei hodi bele fó dalan rezolve problema.

“Ha’u hanoin tempu ona atu haree lei sira ne’ebé maka karik sai fukun ba implementasaun ita presiza hadi’a, atu nune’e bele fó dalan atu rezolve problema sira no halo atividade ho di’ak liután,” Ministru realsa.

Daudaun ne’e petisaun kontinua la’o ba oin no hein desizaun husi Tribunál tanba pertisaun ne’e entrega mós ba Tribunál Rekursu, Parlamentu Nasionál, MAPKOMS inklui Sekretaria Estadu Komunikasaun Sosiál (SEKOMS).

Razaun petisionáriu na’in-31 hatama petisaun tanba konsidera eleisaun ba reprezentante CI la tuir lei númeru 5/2014 Komunikasaun Sosiál nian no dekretu-lei númeru 25/2015 Estatutu Konsellu Imprensa nian, tanba tuir baze legál rua ne’e, eleisaun permite de’it reprezentante jornalista iha CI hili hosi jornalista sira maibé realidade hatudu iha eleisaun ne’e maioria husi partisipante ema na’in-256 la’ós jornalista.

Iha Estatutu CI, artigu 17 kona-ba Eleisaun Reprezentante Jornalista no Órgaun Komunikasaun Sosiál sira-nian, haktuir iha alínea 4 katak ema ne’ebé bele kandidata-an no ema hili nu’udar reprezentante jornalista sira-nian.

Nune’e mós, jornalista sira ne’ebé iha kapasidade ho karteira profisionál ne’ebé fó-sai husi CI ne’ebé la hala’o knaar sira maka la hanesan ho profisaun jornalista nian tuir artigu 17 Lei Komunikasaun Sosiál nian no ema propoin hosi proponente mínimu porsentu lima husi jornalista sira-ne’ebé iha kapasidade ho karteira profisionál ne’ebé fó sai hosi CI.

Antes ne’e, AJTL liuhosi ninia Prezidente, Zevonia Vieira ho membru sira seluk husu ba Parlamentu Nasionál atu anula petisaun jornalista na’in-31 ne’ebé aprezenta hosi Inisiadór Petisaun Atuál Jornalista Timor Post, Noemio Falcão.

“Ami husu ba Parlamentu Nasionál atu labele konsidera karta petisaun ne’e, tanba sira viola desizaun konferénsia AJTL nian hodi hili Virgílio “Lamukan” Guterres hanesan membru AJTL ne’ebé sai nu’udar membru Conselho de Imprensa ba periódu 2020–2024,” dehan Zevonia liuhosi konferénsia imprensa ne’ebé hala’o iha sede AJTL, Fatuhada, foin lalais.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here