Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão

DILI, 16 jullu 2020 (TATOLI)—Komisaun A (Justisa no Konstitusionál) aprova ona relatóriu no pareser projetu-lei Medida Prevensaun no Kombate Korrupsaun (MPCC-sigla portugés), no relatóriu no pareser ne’e sei enkamiña ba Prezidente Parlamentu Nasionál, Deputadu Aniceto Guterres hodi tau ajenda.

Notísia Relevante: Komisaun A Altera LAC Tanba Proposta Orijinál Laiha Matéria Prevensaun no Deklarasaun Bens

“Ohin, ami (deputadu na’in-sia) konsege aprova unanimidade testu finál kona-ba Medida Prevensaun no Kombate Korrupsaun ho artigu entra em vigór ne’e 118 artigu, uluk to’o proposta ho artigu 121 ne’e, horisehik ami haree fila-fali artigu balun ladún importante ami hasai tiha. Ami armoniza lei ne’e tuir prosesu lijístiku interna liga ba publikasaun aktus, liga ba interpretasaun lei sira seluk nian, liuliu Kódigu Penál. Liafuan jurídiku ne’ebé ke labele implika iha interpretasaun “sala karik” entaun loron rua ne’e ami ajusta hotu ona,” Prezidente Komisaun A, Deputadu Joaquim dos Santos, informa ba jornalista sira, iha resintu Parlamentu Nasionál, kinta ne’e.

Kompozisaun Meza Komisaun A kompostu hosi Prezidente Komisaun Joaquim dos Santos hosi FRETILIN, Vise-Prezidente Komisaun A Deputadu Francisco Vasconcelos hosi PLP, Sekretáriu Meza mak José Pacheco hosi FRETILIN.

Membru Komisaun A mak hanesan Deputada Carmelita Caetano Monis hosi Bankada CNRT, Deputadu Oscar de Araújo hosi CNRT, Deputadu Francisco David Xavier Carlos hosi bankada UDT/FM, Deputadu Francisco Miranda Branco hosi FRETILIN, Dário Madeira hosi FRETILIN, Deputadu Patrocício Fernandes dos Reis hosi CNRT.

Iha aprovasaun relatóriu no pareser ba testu finál projetu-lei MPCC ne’e marka prezensa hosi deputadu na’in-sia (9) hosi bankada parlamentár hotu-hotu, deputadu hosi Bankada KHUNTO, António Nobre Tilman mak justifika tanba ba partisipa atividade Komisaun C (Finansa Públika nian) iha Munisípiu Baucau. Purtantu Deputadu Bankada PD, Adriano do Nascimento la partisipa tanba moras.

Deputadu Joaquim dos Santos fó-sai katak, estrutura lei no objetivu lei ne’e Komisaun A re-define fali katak reformula fali lei ne’e ninia objetivu tanba objetivu ne’e kobre hotu kedas prevensaun ninian.

“Orsida dokumentu haruka ona ba Prezidente Parlamentu Nasionál, konforme ha’u rona informasaun hosi prezidénsia katak ajenda ba segunda-feira maibé ne’e kompeténsia prezidente nian, bele segunda no tersa-feira. Ami (Komisaun A) nia serbisu finál ona,” Deputadu Joaquim dos Santos hateten.

Notísia Relevante: Komisaun A Konklui Ona LAC, Aban Hatama Relatóriu Finál ba PN

 Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here