Komandante Jerál PNTL, Komísariu Faustino da Costa. Imajen /Antonio Goncalves

DILI, 16 jullu 2020 (TATOLI) – Komandu Polísia Nasionál Timor Leste (PNTL), la autoriza Ângela Freitas ho nia grupu atu halo manifestasaun, tanba pedidu ne’ebé grupu ne’e dirije ba komandu la prenxe rekezitu manifestasaun nian.

“Ami bolu ona sira-nia parte hodi dehan ba sira katak laiha manifestasaun mak atu akontese. Tanba tempu ne’ebé iha, pedidu ne’e la tuir no sees ona husi prosedimentu ne’ebé iha, sees  hosi lei autorizasaun manifestasaun nian”, dehan Komandante Jerál PNTL, Faustino da Costa, ba jornalista sira hafoin enkontru regulár ho Prezidente Repúblika (PR), Francisco Guterres Lú Olo”,  iha Palásiu Prezidensiál Nicolau Lobato Bairru Pité, kinta ne’e.

Komandante Jerál ne’e rekoñese, parte PNTL simu duni karta koñesimentu ida iha loron 14 fulan jullu, tanba ne’e komandu bolu ona parte sira ne’ebé mak atu organiza no haree ba kestaun legál, prosedimentu hotu, loos duni katak konstituisaun prevee ema hotu bele halo asaun saida de’it inklui manifestasaun.

“Maibé iha lei oan balun iha ne’eba, husu atu tuir rekezitu ka prosedimentu balun. Ami haree katak iha ne’ebá primeiru tenke fó hatene ba polísia loron haat tutuir malu antes.  Ida-ne’e mak ami haree no iha parte segundu, ami mós haree kestaun ida kona-ba sé mak atu organiza, ema na’in hira tenke asina no tenke mai aprezenta án. Ida-ne’e mak ami atu dehan ba ita-boot sira no ba públiku katak laiha manifetasaun”, nia akresenta.

Parte komandu PNTL mós sei fó autorizasaun ba reprezentante ema ida ka rua, ne’ebé iha koordenasaun ho polísia sei mai hato’o petisaun hasoru Prezidente Repúblika maibé la’ós atu halo manifestasaun no sei la mobiliza ema barak atu halo asaun ida-ne’e.

“Ami mós hato’o ona ba sira katak bainhira iha asaun balun ne’ebé maka derrepente ema barak halo buat balun, mak ita-boot sira ne’ebé halo pedidu organiza ne’e mak ami sei bolu atu responsabiliza”, nia fó atensaun.

Antes ne’e iha loron 13 fulan ne’e, Rezisténsia Nasionál Defende Justisa no Konstituisaun (RNDJK) ho nia koordenadór Cornélio Barros hamutuk ho portavós Ângela Freitas, hakerek no assina karta hodi haruka ba komandu PNTL ho objetivu husu autorizasaun, fó koñesimentu, husu akompañamentu ba atividade mobilizasan masa, marsa ba dame no konsentrasaun masa.

Tuir planu, grupu ne’e sei hala’o atividade sira mak hanesan halo mobilizasaun masa ne’ebé sei konsentra iha Bairru Formosa iha sesta loron 17 fulan jullu hahu tuku 07:00 dadeer otl to’o ramata.

Iha karta pedidu ne’e mós hakerek katak delegasaun sei kontinua lori karta petisaun ba hasoru Prezidente Repúblika, Francisco Guterres Lú Olo, iha Palasiu Prezidensiál Nicolau Lobato, Bairru Pité, Dili.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here