Diretór Ezekutivu FONGTIL, Daniel Santos do Carmo. Imajen/Antónia Gusmão

DILI, 16 jullu 2020 (TATOLI) – Fórum Organizasaun Naun Govermentál Timor-Leste (FONGTIL) hasa’e kapasidade membru rejiaun leste ne’ebé kompostu hosi Munisípiu Manatuto, Baucau, Viqueque, no Lautém kona-ba oinsá atu define planu estratéjiku.

Diretór Ezekutivu FONGTIL, Daniel Santos do Carmo, konsidera formasaun planu estratéjiku ne’e hanesan parte ida atu fó resposta ba papél sosiedade sivíl.

“FONGTIL ninia papél maka atu hasa’e kapasidade membru sira, entaun formasaun planu estratéjiku ba membru sira ne’e hanesan parte ida atu fó resposta ba papél sosiedade sivíl. Liu-liu maka atu kapasita ita-nia membru sira iha área planu estratéjiku hanesan ajuda sira atu define prioridade ne’ebé atu halo serbisu hodi kontribui ba objetivu jerál Estadu nia,” tenik Daniel Santos, iha sla enkontru FONGTIL, Caicoli, kuarta (15/07).

Objetivu hosi formasaun ne’ebé realiza kada tinan ne’e hodi prepara di’ak liután membru sira hodi halo papél hanesan parseiru krítiku Estadu iha prosesu konstrusaun.

Bainhira membru sira ramata formasaun no fila ba idaidak ninia munisípiu, sei aplika saida maka aprende iha formasaun ba sira-nia organizasaun, nune’e bele define estratejia sai objetivu estratéjiku.

Diretór ne’e informa, parte FONGTIL sei halo akompañamentu ba membru sira atu garante katak objetivu ne’ebé sira deside hamutuk duarante formasaun ne’e sei aplika iha terrenu tanba servisu ne’ebé sira sei halo maka relasiona ho kontekstu lokál no problema sosiál iha área ne’ebé sira serbisu.

Formasaun planu estratéjiku sei realiza durante loron hitu, hahú loron 15 jullu no bainhira formasaun ba membru rejiaun leste ramata sei kontinua iha rejiaun oeste no Oé-cusse.

“Divizaun territoriál ne’e ita iha rejiaun tolu ne’ebé mai parte leste sentrál, oeste no Rejiaun Administrativa Espesiál Oé-cusse Ambeno (RAEOA), entaun formasaun ida ne’e ita foku liu ba Organizasaun Naun Govermentál (ONG) parte leste, ne’ebé kuaze membru husi NGO hamutuk 25 mak partisipa,” nia akresenta.

Daniel realsa, formasaun ne’e nia durasaun tenke to’o semana ida, tanba ne’e ohin la’ós formasaun teoria maibé hanesan prátika no orienta membru sira atu define sira-nia objetivu estratéjiku organizasaun nian.

Jornalista: Antónia Gusmão

Editora: Julia Chatarina

 

 

HAKEREK NO HATÁN

Please enter your comment!
Please enter your name here