Logotipu TDD. Imajen/Egas Cristóvão

DILI, 16 jullu 2020 (TATOLI) – Tribunál Distritál Dili (TDD) liuhosi desizaun absolve arguida AM hosi kazu oho bebé (infantisídiu ) ne’ebé Ministériu Públiku imputa ba arguida.

Leitura akórdaun ba desizaun Juiz koletivu, Ercilia de Jesus, Afonso Carmona, Albertina Neves, ho razaun absolve kazu refere tanba na’in ba asaun penal liuhosi Prokuradór titulár Antonio Tavares aprezenta akuzasaun sira hotu ba promosaun prova la provadu, inklui laiha teste médiku ka autópsia, nune’e mós ho entendimentu Tribunál nian liuhosi deklarasaun arguida no sasin sira iha julgamentu sira liubá, la atende katak, arguida mak iha momentu ne’ebá bainhira partu tiha nia oan bebé mane ida fila oho fali. Nune’e hatudu duvida boot kona-ba kauza loloos, tanba ne’e fó konviksaun ba Tribunál deside laiha prova atu kondena arguida.

Tuir entendimentu Tribunál nian deside absolve arguida hosi krime infantisídiu ne’ebé previstu iha artigu 142 hosi kódigu penál Timor-Leste, hatete inan ne’ebé oho nia oan durante partu ka tuir kedas partu no kuandu nia sei iha partu nia influénsia pertubadora sei hetan pena prizaun tinan-tolu  to’o tinan-10, ne’ebé antes ne’e Ministériu Públiku imputa ba arguida.

Defeza Henrique Maris ne’ebé fó asisténsia legal ba arguida hateten, desizaun Tribunál nian ne’e justu no fundamentu, tanba tuir deklarasaun arguida rasik la oho nia oan ne’ebé nia partu, tanba momentu ne’ebá atu ba hariis-fatin soe bee, maibé to’o iha hariis-fatin sintoma la’ós atu soe bebé, labarik mak tun nune’e arguida mesak hodi duni nia liman ajuda dada sai bebé, depois bebé sai arguida dezmaia lahatene to’o família sira foti bebé lori ba ospitál.

Bainhira lori-fila bebé mai um mak iis kotu no  família hato’o keixa ba polísia. Enkuantu, antes ne’e Ministériu Públiku liuhosi faktu ne’ebé arrola katak, iha tinan 2018 iha Aileu arguida AM iha nia rezidénsia bainhira partu nia oan fila estraga ka oho iha hariis-fatin laran.

Tuir prosesu ho desizaun Tribunál nian iha primeira instánsia kuandu parte Ministériu Públiku la konkorda bele halo rekursu dentru prazu loron 15 (hosi loron desizaun akórdaun Tribunál nian).

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here