Xefe Estadu Maiór Jenerál F-FDTL, Majór Jenerál Lere Anan Timur Imajen/Eugénio Pereira

DILI, 15 jullu 2020 (TATOLI)–Xefe Estadu Maior FALINTIL Forsa Defeza Timor Leste (F-FDTL), Majór Jenerál Lere Anan Timur, konsidera Kay Rala Xanana Gusmão iha direitu atu rezigna an hosi kualkér kargu ne’ebé nia asume.

Lere hato’o konsiderasaun ne’e, hafoin hala’o enkontru semanál ho Prezidente Repúblika (PR), Francisco Guterres “Lú Olo”, iha Palásiu Prezidensiál Nicolau Lobato, Bairru Pité, Dili.

“Kona-ba asuntu ida-ne’e ha’u laiha kompeténsia atu ko’alia. Maibé, ha’u bele dehan katak Timor la’ós ema ida-nian. Maun Xanana uluk iha ai laran ne’e, ha’u rasik mós dehan hanesan ne’e, kuandu maun Xanana mate ka ema kaer, funu lakon, no karik imi mós rona ami ko’alia ida-ne’e. Maibe, kuandu ema kaer tiha maun Xanana, ami dehan, ba luta kontinua. Agora Timor mós hanesan ne’e. Se maun Xanana rezigna an ne’e, ninia direitu. Agora ema ne’ebé atu troka nia ne’e mak tenke fera ulun,” Lere hato’o konsiderasaun ne’e, hodi responde pergunta jornalista kona-ba impaktu hosi rezignasaun lider nasionál Kay Rala Xanana Gusmão.

Lere mós hateten, ema hotu tenke respeita Kay Rala Xanana Gusmão nu’udár lider nasionál no ema hotu-hotu tenke rekoñese ninia esforsu, tantu ba luta libertasaun nasionál no ba dezevolvimentu nasionál.

“Maibé, Maun Xanana presiza mós atu esplika razaun hosi ninia rezignasaun ne’e ba Prezidente Repúblika no Primeiru-Ministru,” Lere sujere.

Lere esplika, laiha impaktu hosi  Xanana Gusmão ninia rezignasaun ne’e tanba Xanana  hanesan mós sidadaun baibain ne’ebé sempre troka malu.

Lere fó ezemplu, Prezidente Repúblika mós ho nia mandatu tinan lima, troka malu no ema ne’ebé mai ne’e mak tenke hatutan ninia servisu labele halo foun.

“Agora, se mak atu troka maun Xanana mós tenke hatutan ninia servisu no la’ós mai atu halo foun fali. Ida-ne’e mak importante. Tanba,  Maun Xanana rezigna an ne’e ninia direitu,” Lere subliña.

Entretantu, líder Nasionál Kay Rala Xanana Gusmão rezigna aan hsi reprezentante espesiál Governu Timor-Leste ba prosesu negosiasaun fronteira marritima no dezenvolvimentu projetu petroliferu iha tasi Timor, liuhosi karta ne’ebé haruka ba Primeiru-Ministru, Taur Matan Ruak, iha sesta semana kotuk.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here