Sekretáriu Jerál no Atual Deputado (UDT), Francisco David Xavier Carlos. Imajen/ Egas Cristóvão

DILI, 15 jullu 2020 (TATOLI)—Paritdu União Democrático Timorensse (UDT) no Frente-Mudança (FM) sei fahe bankada iha fulan-setembru 2020, nune’e bele loke tán espasu bankada parlamentár iha Parlamentu Nasionál.

“Ami fahe bankada ne’e pedidu hosi Frente-Mudança. Nune’e, loke tán espasu ba sira-nia parte no mós hosi ami-nia parte. Tanba ne’e, ami iha konkordánsia maibé seidauk bele. Agora, ami sei hamutuk nafatin to’o setembru depois aprezentasaun Orsamentu Jerál Estadu mak ami foin fahe loloos,” Xefe Bankada UDT/FM, Deputadu Francisco David Xavier Carlos, informa ba Agência TATOLI, kuarta ne’e.

Deputadu Francisco David Xavier Carlos dehan, la signifika iha dezintendimentu maibé bankada rua ne’e mak iha konkordánsia hodi loke espasu

Iha loron 9 fulan-jullu 2020, Prezidente Parlamentu Nasionál, Deputadu Aniceto Guterres, informa ba plenária kona-ba pedidu Bankada UDT/FM ne’ebé atu fahe bankada ne’e.

Bankada UDT/FM atu fahe bankada ne’e bazea ba Rejimentu Parlamentu Nasionál (RPN) artigu 11 (Konstituisaun12 no Organizasaun), alínea 1 hateten deputadu sira-ne’ebé eleitu tuir lista partidu ka koligasaun partidu, bele halibur iha bankada parlamentár, la haree ba iha koligasaun pré-eleitorál partidu sira-nian ka lae.

Alínea 2 hosi artigu 11 ne’e, dehan atu konstitui bankada parlamentár ida-idak tenke hato’o komunikasaun eskrita ba Prezidente Parlamentu, ne’ebé asina hosi Deputadu sira-ne’ebé hola parte no indika bankada nia Prezidente no Vise-Prezidente, karik iha.

Alínea 3 hosi artigu ne’e esplika, kualkér alterasaun iha kompozisaun bankada nian tenke fó hatene ba Prezidente Parlamentu.  Alíena 4 fundamenta, funsaun prezidente, vise-prezidente ka membru Meza nian inkompatível ho funsaun prezidente bankada parlamentár nian.

Alínea 5 hosi artigu 11 akresenta, bainhira bele sei fó ba bankada parlamentár sira apoiu ne’ebé presiza tebes, hanessan gabinete traballu.

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here