Embaixadór Indonézia mai Timor-Leste, Sahat Sitorus, Komandante Jerál PNTL, Komisáriu Faustino da Costa no Country Manager Kompañia Mie Sedap iha Timor-Leste, Henny Kurniawan hala’o konferénsia imprensa, hafoin fó apoiu supermie kaixa 970 ba Komandu PNTL, kuarta (15/07/2020). Imajen/Eugénio Pereira

DILI, 15 jullu 2020 (TATOLI)- Komandu Polísia Nasional Timor-Leste (PNTL) simu oferta supermie kaixa 970 hosi Embaixada Repúblika Indonézia (KBRI, sigla Indonézia) iha Timor-Leste no kompañia Mie Sedap Timor-Leste.

Embaixadór Indonézia mai Timor-Leste, Sahat Sitorus deklara, apoiu umanitária ne’e hanesan meiu ida atu ajuda membru PNTL sira ne’ebé hala’o servisu hodi ajuda Governu no sosiedade luta kontra surtu Coronavirus ka COVID-19 iha Timor-Leste.

“Ha’u mai hamutuk ho kompañia Mie Sedap mai hala’o enkontru ho Komandante Jerál PNTL hodi fó apoiu sasán nesesidade báziku hanesan supermie kaixa 970 hodi apoiu di’ak liután lojístika PNTL nian,” hateten Embaixadór Sahat Sitorus, ba jornalista iha Komandu Jerál PNTL, Caicoli, Dili.

Embaixadór ne’e husu atu Kompañia Mie Sedap kontinua servisu hamutuk ho Komandu PNTL no ajuda mós populasaun kbiit-laek sira ne’ebé presiza apoiu iha tempu ida agora luta kontra COVID-19.

Parte seluk, diplomata ne’e hato’o parabéns ba Governu Timor-Leste no entidade hotu-hotu ne’ebé servisu maka’as tebes hodi luta kontra COVID-19 too agora iha Timor-Leste seidauk rejista kazu foun ruma.

Nia hatutan, dezde estadu emerjénsia, Embaixadór rasik koordena ho Governu Timor-Leste kada loron kuarta loke fronteira terrestre ho tempu oras rua fasilita sasán nesesidade báziku tama mai Timor-Leste.

Sahat Sitorus apresia mós koordenasaun servisu Unidade Patrullamentu Fronteira (UPF) no Tentara Nasional Indonézia (TNI) ho Polisia Repúblika Indonézia (POLRI) hodi asegura metin lutu fronteira para kontrola sidadaun nasaun rua la halo atividade no movimentu ba mai hodi prevene risku COVID-19 iha liña fronteira rai rua.

Iha fatin hanesan, Komandante Jerál PNTL, Komisáriu Faustino da Costa hato’o agradese ba KBRI no Kompañia Mie Sedap hodi apoia komandu PNTL atu distribui sasán nesesidade báziku ne’e ba unidade PNTL sira.

“Lori komandu PNTL nia naran ami hato’o agradese mós ba Embaixada Indonézia nia apoiu,”  hateten Komandante Faustino da Costa.

Iha fatin hanesan Country Manager Kompañia Mie Sedap iha Timor-Leste, Henny Kurniawan dehan, apoiu ne’e oferese ho intensaun atu ajuda PNTL iha tempu luta hasoru COVID-19, tanba PNTL sempre hala’o kna’ar iha tempu loron no kalan.

Ajuda hirak ne’e hanesan faze dahuluk no iha faze daruak nian sei oferese tan supermie kaixa 730.

“Ami hato’o agradese ba PNTL tanba durante tempu Estado Emerjénsia hala’o kna’ar di’ak, no buat hotu la’o ho seguru, no ami sidadaun estranjeiru mós hala’o atividade ho di’ak tanba ami sente seguru ho PNTL nia servisu iha terrenu,”  afirma Henny Kurniawan.

Jornalista   : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here