Komandante Polísia Munisípiu Dili, Superintendente Xefe Henrique da Costa. Imajen Tatoli/Dok.

DILI, 14 jullu 2020 (TATOLI)-Komandante PNTL Munisípiu Dili, Superintendente Xefe, Hendrique da Costa, husu ba estudante sira iha Universidade Nasionál Timor Lorosa’e (UNTL) atu evita no prevene aan husi atividade tranzaksaun tráfiku droga  no konsume ai-moruk droga iha Timor-Leste.

Nia hato’o pedidu ne’e bainhira hala’o vizita ba estudante UNTL sira iha Kampus UNTL tersa ne’e.

“Ohin loron trafikante ba droga  sira uza ona atividade civitas akadémiku ka estudante universitáriu sira hodi manifesta sira-ninia atividade illegál ne’e, tanba sira hatene kampus nu’udar área autónomu ida ne’ebé la autoriza instituisaun seluk halo ninia intervensaun iha laran,”dehan nia.

Tuir Komandante Polisia Nasionál Timor-Leste ne’e katak esperensia nasaun boot sira iha rai li’ur balun, trafikante droga uza estudante sira atu halo tranzaksaun ba ai-moruk droga.

“Alvu tranfikante droga sira hili kampus ne’ebé nakonu ho estudante sira hodi hametin sira-nia rede krime organizadu,  tanba sira hatene katak estudante iha mós ligasaun barak. Entaun kampus sai objetu ba sira, maski Timor-Leste seidauk akontese,”nia alerta.

Superintendente Xefe, Hendrique da Costa,husu ba estudante no ema hotu-hotu atu informa ba parte polisia bainhira identifika atividade tranzaksaun droga.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here