Lansamentu livru ‘Linda Labarik ho Defisiénsia Fíziku’ no livru ‘Ha’u ho Belun Sira’ ba eskola pre-eskolar’. iha Hotel Novu Torismo. Imajen/Osória Marques.,

DILI, 15 jullu 2020 (TATOLI)–Diretór Nasionál MARY MACKILLOP today, Alipio Baltazar, hateten prosesu konsulta no elabora ideia no dezeña livru rua ne’e, MARY MACKILLOP today gastu osan hamutuk $22,000 ne’ebé mak hetan suporta hosi parseiru Australia.

“Parseiru Australia ajuda ami osan no gastu ne’e hamutuk $22,000. Hosi osan ne’e, ami prodús ona livru hamutuk 900 ne’ebé mak tarjetu uluk ba eskola sira ne’ebé mak sai ami-nia tarjetu sira. Maibé la taka dalan ba eskola sira no ami mós sei emprime tan no depende ba eskola hira mak ami tama,” Diretór Nasionál MARY MACKILLOP today, Alipio Baltazar, ba jornalsita sira hafoin lansamentu livru ba defisiensia sira iha Hotel Novo Turismu, Dili, kuarta ne’e. 

Nia hatuatn, livru hirak ne’e sei distribui ba eskola tarjetu MARY MACKILLOP today nian iha eskola hamutuk 40-resin iha Timor Leste.

Diretór ne’e hatetetn lansamentu livru ‘Linda Labarik ho Defisiénsia Fíziku’ no livru ‘Ha’u ho Belun Sira’ ba eskola pre-eskolar’, hodi investe koñesementu labarik sira-nian iha eskola pre-eskolar no ensinu báziku iha Timor-Leste.

Diretór Nasionál MARY MACKILLOP today, Alipio Baltazar. Imajen/Osória Marques.

“Ami-nia esperensa lansamentu ba livru rua ne’e, atu investe koñesementu kona-ba labarik sira iha eskola pre-eskolar no ensinu báziku, tanba ita-nia rekursu limitadu ba iha sosiedade ida ne’ebé moris ho inkluzivu. Maski halo kampaña no halo advokásia ne’ebé mak hala’o hosi organizasaun defisiénsia, ne’ebé halo ona iha sosiedade maibé ba iha labarik sira ne’e sei menus tebes,” nia dehan. 

Liuhosi livru ne’e, nia dehan, bele introdús ona ba labarik sira iha eskola pre-eskolar no ensinu báziku ne’ebé mak bele moris iha sosiedade ida ne’ebé mak inkluzivu.

“Hosi báziku sira mak ema komesa introdús ona katak inkluzivu iha sosiedade ne’e mak oinsá ne’e. Entaun liuhosi livru ne’e, bele hasa’e ona labarik sira-nia koñesementu/ Ho livru ida-ne’e, ita bele sensibiliza ona sira hodi sira moris ho sosiedade ida-ne’ebé mak inkluzivu,” dehan Diretór Nasionál MARY MACKILLOP today.

Relasiona ho edukasaun inkluzivu, nia informa, eskola barak iha área rurál mak sei falta rekursu hodi apoiu ba edukasaun inkluzivu.

“Eskola sira ne’bé mak ami vizita ona iha área rural sira, dala barak profesór sira iha limitsaun maka’as, liliu iha eskola balun laiha liu rekursu hodi apoiu, kurikúlu iha Ministériu Edukasaun Juventude no Desportu (MEJD) ne’ebá mós sita kona-ba edukasaun inkluzivu maibé rekursu hodi apoiu profesór hodi halo referénsia mós laiha,” nia haktuir.

Entaun ho kestaun ne’e, nia hateten, MARY MACKILLOP today foti inisiativa hodi koordena ho MEJD inklui ho Ministériu Solidaridade Sosiál no Inkluzaun (MSSI) hodi konsulta katak oinsá mak bele hakerek livru ida.

“Ho ida-ne’e, ami foti inisiativa ida hodi koordena ho MEJD no ita-nia organizasaun defisiente sira inklui MSSI atu halo konsultasaun hodi oinsá maki ta bele hakerek livru ida hodi bele fó apoiu ba profesór sira. Maibé iha fulan hitu ho balun ita konsege prodús livru rua ne’ebé mak ohin ita entrega ofisialmente ba MEJD katak ho livru ne’e fó diretamente ba eskola sira,” nia esplika.

Tuir nia, iha parseira internasionál balun mós halo pedidu mai iha MARY MACKILLOP today atu apoiu hodi emprime livru sira-ne’e, hodi fahe ba profesór sira.

Lansamentu ba livru rua ne’e hetan partisipa hosi Vise-Ministru Edukasaun Juventude no Desportu (MEJD), Asosiasaun Defisiente Timor Leste (ADTL), RHTO, reprezenta komisária direitu labarik, reprezenta hosi AUSTRALIA, reprezenta Uniaun Europeia (UE), INFORDEPE. No livru ne’e lansa hosi MEJD.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here