Ministru Justisa, Manuel Cárceres da Costa. Imajen/Antonio Goncalves

DILI, 15 jullu 2020 (TATOLI) – Ministru Justisa (MJ), Manuel Cárceres da Costa, hateten ema hotu iha direitu inklui Estudante Front Mahasiswa Timor-Leste (MUTL) bele halo manifestasaun.

Notísia Relevante : Presiza Lei Difamasaun Atu Hamate Liberdade Ema Tolok Arbiru

Manuel Cárceres hateten lia hirak-ne’e, ohin, relasiona ho ezijénsia MUTL nian ne’ebé deklara pozisaun hodi fó ultimatu sei mobiliza manifestasaun kontra governu se governu avansa ezbosu Lei Kriminaliza Difamasaun.

MUTL konsidera sei ezbosu Lei Kriminaliza Difamasaun sei hamate totalmente sidadaun hotu-hotu nia liberdade opiniaun ka espresaun tuir artigu 40 iha Konstituisaun KDTL no konvensaun internasionál sira hanesan deklarasaun direitu universal direitu umanu no sei la valoriza estadu direitu demokrátiku.

“Ida ne’e sira MUTL nia direitu, sira-nia hakarak no lei regula ita hotu,” hateten Ministru Justisa, Manuel Cárceres da Costa, hodi responde jornalista sira Palaçio do Governo.

Manuel Cárceres kontinua defende katak, lei ne’e la hamate liberdade imprensa no liberdade espresaun no sei la proteje governante sira no sei defende sidadaun hotu, tanba lei ne’e iha ne’ebá la hatete atu tolok, maibé labele tolok ema, insulta, dun matak no labele bosok.

Nia esplika, laiha lei kona-ba kriminaliza difamasaun, maibé halo de’it alterasaun ba kódigu sivíl ba kódigu penal.

“Ezbosu ne’e sai hafoin rona tiha parte sira hotu nia preokupasaun. Laiha artigu ida mak sei defende ukun-nain sira, maibé artigu hotu sei defende direitu orna no reputasaun sidadaun hotu nian,” hateten Manuel Cárceres.

Jornalista   : Nelson de Sousa

Editór        : Francisco Simões

1 KOMENTÁRIU

  1. Ho devido respeitu ba Sr Ministru, esplikasaun ne’e la responde preokupasaun kona-ba kestaun ka possibilidade ema atu tama iha komarka tanba de’it falta edukasaun tolok ema seluk.
    Ha’u bele antisipa kedas ona katak kazu krime iha tribunal sei aumenta, possivelmente sei aumennta nesesidade atu hari tan komarsa foun no orsamentu estadu ba populasaun iha komarka mos sei aumenta. Aumentu despeza ba Estadu tanba deit kestaun tolok enkuantu setór produtivu sira seluk sei kuran nafatin osan atu dezenvolve ekonomia TL.

    Iha ha’u nia opiniaun ne’e la’ós “smart governance”

HAKEREK NO HATÁN

Please enter your comment!
Please enter your name here