Polísia Tránzitu Munisípiu Dili halo investigasaun asidente tráfegu iha área Palapasu, Dili. Imajen/Eugénio Pereira

DILI, 15 jullu 2020 (TATOLI)- Mikrolete (09) ho númeru matrikula 37022, ohin loro-kraik, soke motor Honda Scopy ho númeru matrikula  G. 5842  hodi rezulta mikrolete ne’e baku fila no ema na’in-lima (5) kanek todan.

Ofisiais Polísia Tránzitu hala’o hela identifikasaun ba asidente tráfegu iha area Palapasu, Dili. Imajen/Antonio Gonçalves

Asidente tráfegu iha área kruzamentu estrada Palapasu, Dili, besik edifísiu Zona Espesiál Ekonomia Sosiál Merkadu (ZEESM) ne’e kauza hosi karreta mikrolete ho marka Lorenia Jomy ne’ebé kondús hosi  motorista, Manuel Quelo tula pasajeiru mai hosi diresaun Mandarin ho velosidade soke kedas vítima joven na’in-rua ho motór marka Honda Scopy atu ba parte Motaél nian.

Iha asidente ne’e rezulta vítima joven na’in-rua sofre kanek maka’as iha ain no liman no motór nia sok oin tohar no body motór nakfera hotu.

Hafoin soke vítima joven na’in-rua, mikrolete mós baku fila rezulta pasajeiru kuaze na’in-tolu (3) sofre kanek maka’as iha ulun no kotuk-laran.

Akontesimentu, halo komunidade sira ne’ebé haree  sente hakfodak no trauma hodi halai ba salva kedas vítima sira hodi evakua ba Ospitál Nasionál Guido Valadares (HNGV) hodi hetan tratamentu intensivu.

Jony Mendonça nu’udar sasin informa karreta halai ho velosidade maka soke motór iha kedas estrada klaran.

“Mikrolete ne’e halai maka’as mak soke kedas motór ne’e too baku fila rezulta ferik ida no alin feto na’in-rua no avó ferik-ida iha karreta laran kanek maka’as no joven na’in-rua ne’ebé lori motór mós sofre kanek maka’as,” Jony  fó sasin ba Agência Tatoli.

Parte polísia mós halo kedas apreensaun hodi lori motór no karreta ba Eskuadra Polísia Munisípiu Dili hodi submete  ba investigasaun kle’an.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here