DILI, 15 jullu 2020 (TATOLI)- Ekipa Promosaun Komandu Polísia Nasional Timor-Leste (PNTL) entrega relatóriu primeiru prosesu promosaun por eskolla ba Komandante Jerál.
Komisaun Promosaun PNTL nu’udar Órgaun Administrativu ne’ebé estabelese iha Instituisaun PNTL atu bele haree no prosesu ba dezenvolve karreira pesoál efetivu PNTL.
Promosaun por Eskolla ne’ebé hala’o ona iha inísiu 2017 no finaliza iha 2020 ho realizasaun Promosaun por Eskolla iha loron 27 marsu 2020 ba postu sira hanesan Superintendente Xefe hamutuk na’in-neen (6), Superintendente na’in-15, Superintendente Asistente na’in-14, Inspetór Xefe na’in-32 no Sarjentu Xefe hamutuk na’in-23.
Segundu Komandante Jerál PNTL Komisáriu Mateus Fernandes hanesan mós Prezidente Komisaun Promosaun hateten, maske hetan difikuldade no obstákulu durante prosesu ne’e la’o, maibé ho komisaun tomak no asesór sira nia tulun, konfiansa mai hosi komandante jerál ne’ebé fó mai ekipa promosaun hodi jere prosesu ne’e to’o remata ho susesu.
“Agradese no parabéns ba ita hotu ne’ebé maka hola parte iha ekipa komisaun promosaun ne’e ba servisu tomak ne’ebé hala’o ona to’o ohin ita realiza serimónia entrega relatóriu ba komandante jerál,” dehan Komisáriu Mateus Fernandes, liuhosi karta komunikadu imprensa ne’ebé Agênsia Tatoli asesu hodi Komandu PNTL.
Fatin hanesan, Komandante Jerál Komisáriu Faustino da Costa dehan, razaun no tanba saida maka halo promosaun ne’e maka iha legalidade hodi fó dalan atu bele halo prosesu promosaun ne’e. Tanba, iha tinan 2015, 2016 no 2017 hanoin atu halo promosaun, maibé dalan atu ema hotu lori PNTL la’o ho profisionalizmu implementa lei kumpre nafatin regra sira.
“Iha sorin seluk promosaun ne’e ita halo tanba presiza mós atribui responsabilidade ne’ebé maka legalidade iha ona fó ba ita, nune’e iha halo prosesu ne’e ba dahuluk iha loron 27 marsu, tinan ne’e, no ita hotu hatene katak legalidade ne’ebé iha seraque ida ne’e natoon ona mantein ba ita atu bele la’o ba oin ka durante diskusaun iha komisaun nian keta iha hanoin ruma ba oin atu hadi’a ka altera diploma ministeriál ne’ebé iha tantu mós iha dekretu governu nian,” nia hateten.
Komisáriu Faustino da Costa informa ba Komisaun Promosaun katak oportunu hanesan ne’e tinan oin bele halo, bele mós akontese, bele mós depois tinan ida tan, maibé ida ne’e la signifika komisaun nia servisu remata ona tanba PNTL nia rejime promosaun rasik termina katak segundu komandante jerál maka prezide asuntu promosaun ne’ebé Departamentu Rekursu Umanu maka sai hanesan sekretária ba iha prosesu tomak.
Nia tenik, atu realiza promosaun iha tinan oin ka tinan rua mai preparasaun tenke hahú agora ho maneira hare ba diploma ministeriál ne’ebé no Regulamentu Avaliasaun Méritu (RAM).
Serimónia ne’e, partisipa mós husi Inspetór Jerál, Komandante Komandu Operasaun, Administrasaun, Xefe SIKN, Diretór Rekursu Umanu, Ofisiais Superiór no membru Komisaun Promosaun PNTL.
Jornalista : Eugénio Pereira
Editór : Francisco Simões
