Primeiru-Ministru, Taur Matan Ruak prezide reuniaun Konsellu Ministru, iha Palásiu Governu, kuarta (15/07), Palásiu Governu. Imajen Tatoli/Egas Cristovão

DILI, 15 jullu 2020 (TATOLI) – Hafoin Primeiru-Ministru, Taur Matan Ruak fó pose ona ba Prezidente Autoridade (PA) Rejiaun Administrativu Oé-cusse Ambeno (RAEOA) no Zona Espesiál Ekonomia Merkadu Sosiál, Timor-Leste (ZEESM,TL) foun, Arsénio Paixão Bano iha 12 juñu, Governu Sentrál liuhosi desizaun Konsellu Ministru (KM) nomeia ona Sekretáriu Rejionál Autoridade na’in-hitu no Sekretáriu Rejionál Adjuntu rua hodi fó apoiu servisu PA.

Nomeasaun ne’e liuhosi Projetu Rezolusaun Governu rua ne’ebé aprezenta hosi Xefe Governu no hetan ona aprovasaun.

“Sekretáriu Rejionál Autoridade RAEOA foun sira sei asume responsabilidade iha área hanesan edukasaun no solidaridade sosiál, finansa, terra no propriedade, administrasaun, saúde no komérsiu no indústria,” relata Ministru Prezidénsia Konsellu Ministru, Fidelis Manuel Leite Magalhães hafoin ramata reuniaun KM, iha Palásiu Governu, kuarta ne’e.

Sekretáriu Rejionál Adjuntu sira ba PA RAEOA nian sei kaer knaar ba ezekusaun administrativa, ho kompeténsia atu halo administrasaun konjunta ba área atividade hirak ne’ebé determina ona no bainhira ezerse sira nia funsaun sira sei hatán diretamente ba PA.

Enkuantu PA RAEOA sei asume responsabilidade iha área sira hanesan planeamentu no infraestrutura, ordenamentu territóriu no kadastru inklui dezenvolvimentu rurál no turizmu komunitáriu.

Jornalista: Antónia Gusmão

Editora: Julia Chatarina  

 

HAKEREK NO HATÁN

Please enter your comment!
Please enter your name here