Portavós PNTL, Superintendente Xefe Arnaldo de Araújo. Imajen/dok.Tatoli

DILI, 15 jullu 2020 (TATOLI) – Asidente trafégu ne’ebé akontese iha área Leolbatan, Suku Naimeko, Postu Administrativu Pantemakasar, Rejiaun Administrativa Espesiál Oe-Cusse Ambeno (RAEOA) rezulta ema na’in-tolu (3) mate fatin no  na’in-hitu (7) kanek todan.

Asidente ne’e akontese iha loron 12 jullu 2020, purvolta tuku 19:45 Otl,  kauza hosi karreta kamioneta ida tula pasajeiru no sasán nesesidade baziku sa’e foho labele maka karreta hakiduk fali ba kotuk tun ba rai naruk kuaze metru 35.

“Atu klarifika asidente ne’e akontese tanba karreta la konsege sa’e subida ne’ebé naruk ho sasán no pasajeiru barak, nune’e nia hakiduk no baku fila ba kotuk ho distánsia entre metru 25-35 hosi diresaun Oecusse Vila ba Lakfuan, Suku Naimeko,” informa Portavós PNTL Superintendente Xefe Arnaldo de Araújo, ohin, ba jornalista liu hosi konferénsia imprensa.

Superintendente Xefe Arnaldo hatutan, hafoin akontesimentu parte PNTL ho família inklui ekipa médiku too kedas iha fatin hodi evakua  vítima sira lori ba halo tratamentu intensivu iha ospitál Oe-cuse.

Nia hatutan, vítima sira ne’ebé mate daudaun ne’e família sira lori ona ba hala’o serimónia funerál iha sira-nia moris fatin.

Kona-ba naran vítima sira ne’ebé mate no kanek, parte Komandu PNTL seidauk bele fó sai, tanba sei hein relatóriu investigasaun kompletu hosi komandu polísia Oe-Cusse.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here