Ekipa Servisu Investigasaun Kriminál (SIK), Aniceto do Santos Rego entrega dokumentu ba Diretór Servisu Migrasaun Timor-Leste, Superintendente Xefe Agostinho da Silva Gomes akompaña hosi Adidu POLRI iha KBRI-Dili, Senior Superintendent, Muji Diah Setiani, tersa (14/07/2020). Imajen/Eugénio Pereira

DILI, 14 jullu 2020 (TATOLI)-Estadu Timor-Leste liuhosi autoridade Polísia  Servisu Investigasaun Kriminál (SIK) no Diresaun Jerál Servisu Migrasaun Ministériu Interiór (DJSM-MI), ohin, haruka fila imigrante na’in-13, kompostu hosi sidadaun Indonézia na’in-rua (2) no sidadaun Vietnam na’in-11.

Ba sidadaun Indonézia na’in-rua ne’e, autoridade Timor-Leste nian entrega ba autoridade Repúblika Indonézia liuhosi adidu (atase) Polísia Repúblika Indonézia nian iha Embaixada Repúblika Indonézia nian mai Timor-Leste (KBRI, sigla Indonézia).

Sidadaun Vietnam na’in-11 ne’e, autoridade Timor-Leste nian komunika Embaixada Repúblika Indonézia (KBRI) iha Dili ho apoiu IOM (International Organization for Migration) hodi haruka fila sira ba Jakarta entrega iha Embaixada Vietnam nian iha Jakarta.

Imigrante na’in-13 tama mai area jurizdisaun Timor-Leste ho ró peska liuhosi tasi ho razaun tanba laloran mak lori ka dezastre, maibé hosi identifikasaun autoridade Timor-Leste nian nota katak, imigrante na’in-11 nu’udar sidadaun Vietnam ne’e aluga ró sidadaun Indonézia nian ho objetivu atu halai ba Australia.

Serimónia entrega imigrante sira-ne’e hala’o hosi SIK hodi entrega despaxu hosi Ministériu Públiku Baucau ba Diretór Servisu Migrasaun Timor-Leste, Superintendente Xefe Agostinho da Silva Gomes, akompaña hosi Adidu POLRI  Senior Superintendent, Muji Diah Setiani, no entrega mós dokumentu relevante sira hanesan, telefone no pasaporte.

Hafoin entrega dokumentu no ekipamentu hirak ne’ebé SIK halo apreensaun, ekipa hala’o mós vizita ba haree direita kondisaun saúde imigrante sira iha konfinamentu obrigatóriu ka kuarentena Otél Raikotu, Dili.

Imigrante sira-ne’e laloran tasi lori sira mai area tasi Jaco-Luatem iha loron 12 Juñu 2020 no kazu sira-nian lori ona ba Ministériu Públiku Baucau hetan ona despaxu entrega ba PNTL hodi entrega mai Diresaun Jerál Servisu Migrasaun atu halo prosesu deportasaun ka repatria.

Adidu POLRI  Senior Superintendent Muji Diah Setiani, apresia ho kooperasaun servisu PNTL no Servisu Migrasaun hodi entrega hikas sidadaun Indonézia na’in-rua hosi Sulawesi ne’e ba Embaixada Repúblika Indonézia (KBRI-sigla Indonézia) hodi haruka fila ba sira nia moris fatin.

“Ami agradese tanba PNTL bele entrega sidadaun Indonézia na’in-rua nu’udar peskadór hamutuk ho sidadaun Vietnam na’in-11,” Muji Diah Setiani hateten.

Embaixadór Indonézia, Sahat Sitorus rasik apresia servisu Governu Timor-Leste hafoin salva sidadaun Indonézia na’in-rua no Vietnam na’in-11 hosi dezastre ne’ebé sira hasoru iha tasi Jaco lori mós sidadaun sira kumpre regra saúde nian hodi submete ba konfinamentu obrigatóriu ka kuarentena.

Muji Diah Setiani hateten, KBRI Dili sei servisu hamutuk ho IOM hodi lori sidadaun Vietnam na’in-11 atu entrega ba Embaixada Vietnam nian iha Jakarta-Indonézia hodi kontinua haruka sira fila ba Vietnam.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here