Enkontru entre Sekretáriu Estadu Komunikasaun Sosiál, Merício Juvinal dos Reis ‘Akara’ no Embaixadór Xina ba Timor-Leste, Xiao Jiaguo, iha Embaixada Xina, tersa (14/07). Imajen/Natalino Costa

DILI, 14 jullu 2020 (TATOLI) – Iha biban soru-mutuk entre Sekretáriu Estadu  Komunikasaun Sosiál, Merício Juvinal dos Reis  ‘Akara’ no Embaixadór Xina ba Timor-Leste, Xiao Jiaguo, diskute kona-ba progresu projetu dijitalizasaun Rádiu Televizaun Timor-Leste, Empreza Públika (RTTL,ep).

“Ohin ami hasoru-malu hodi atualiza informasaun kona-ba projetu dijitalizasaun RTTL ne’ebé maka durante ne’e ita halo no hetan suporta husi Governu Xina,” tenik Akara hafoin reuniaun ho Embaixadór Xina iha Embaixada Xina Faról, tersa ne’e.

Nia dehan, projetu muda sistema RTTL husi analog ba dijitál sai hanesan prioridade durante mandatu.

“Dezde ha’u asume kargu nu’udar Sekretáriu Estadu Komunikasaun Sosiál, sei esforsu-an hodi nafatin komunika projetu dijitalizasaun bainhira maka akontese no ikusmai akontese no konsege implementa duni no daudaun la’o ho di’ak, ninia instalasaun atinje ona porsentu 80 no atu finaliza ona iha tinan ne’e,” nia akresenta.

Tuir Akara prosesu instalasaun tarde uitoan tanba situasaun COVID-19, tanba ekipa tékniku ne’ebé durante ne’e fó apoiu projetu fila ba Xina no daudaun aviaun laiha atu mai Timor-Leste.

“Ami ko’alia ona ho Primeiru-Ministru atu fasilita sira, aluga aviaun hodi bele mai fali atu halo ramata projetu ne’e. Tanba ne’e ohin ami atualiza progresu ba malu hanesan kontinuasaun kooperasaun ne’ebé maka ita iha,” nia haktuir.

Biban ne’e, Sekretáriu Estadu ne’e husu Embaixadór Xina atu kontinua tulun Timor-Leste  iha área komunikasaun sosiál.

“Ohin esplika mós oinsá ita-nia kooperasaun ba futuru, hanesan SEKOMS ne’ebé daudaun koadjuva Ministériu Asuntu Parlamentár no Komunikasaun Sosiál (MAPKOMS) atu kontinua komunika ho Señor Ministru, nune’e iha futuru bele tulun liuhosi koopersaun ne’ebé maka ita iha bele diskute kle’an liután karik iha futuru kooperasaun ne’e bele kontinua ba faze daruak dijitalizasaun,” hateten Akara.

Dijitalizaun ba faze dahuluk iha RTTL kobre de’it Dili, Liquiçá no Aileu.

“Ita-nia planu bá-oin ne’e, faze daruak no datoluk ba dijitalizasaun RTTL bele kobre iha Timór laran tomak,” nia informa.

Aleinde ne’e, SEKOMS nafatin hatudu kompromisu atu halo kooperasaun ho Xina atu apoiu mídia sira to’o munisípiu.

Iha fatin hanesan, Embaixadór Xina iha Timor-Leste, Xiao Jiaguo, apresia kooperasaun entre nasaun rua tanba bele dezenvolve ona mídia Estadu.

“Ha’u kontente tebes ho Señor Sekretáriu Estadu tanba ohin loron ita iha projetu dijitalizasaun hosi Governu Xina, ne’ebé sei fó oferese programa iha  televizaun ho kualidade aas,” dehan diplomata xinéz ne’e.

Tuir nia, hafoin kompleta projetu ne’e programa televizaun bele atrai liután telespetadór sira.

Nia haktuir, iha enkontru ohin, parte rua ko’alia mós kona-ba posibilidade kooperasaun iha futuru entre Governu Xina no Timor-Leste iha área mídia nian.

“Relasiona ho ida-ne’e, ba futuru karik iha pedidu ruma ami komprometidu hatán,” Embaixadór ne’e subliña.

Enkontru ne’e akompaña mós husi Prezidente RTTL, Francisco Gari, Prezidente Agência Tatoli, José Costa inklui ekipa husi SEKOMS.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here